ნოე თევზაძე

დაბადების ადგილი: სოფელი გომი, სამტრედიის რაიონი.

1930 წელს დაინიშნა ქუთაისის საგრენაჟო ქარხნის დირექტორად. მუშაობდა აბრეშუმის გრენის მაღალხარისხოვნად დამზადებისათვის; საგრენაჟო ქარხნებში არსებული პრიმიტიული ინვენტარის რეკონსტრუქციისათვის, რაც საჭირო და აუცილებელი იყო ჰიბრიდული გრენის ფართოდ გასავრცელებლად. გამოიგონა სპეციალური ინვენტარი ჰიბრიდული თესლის დასამზადებლად, რომლის საშუალებითაც შესაძლებელი იყო უფრო მაღალხარისხოვანი აბრეშუმის თესლის დამზადება. გამომგონებლობისა და საფეიქრო მრეწველობაში შეტანილი წვლილისათვის დაჯილდოებული იყო ვერცხლის მედლით და წარჩინებულის ნიშნით. ნოე თევზაძის გამოგონება მეაბრეშუმების დარგში აღიარებულია ფართო მნიშვნელობის გამოგონებად და ცნობილია "თევზაძის სისტემის" სახელით. მეაბრეშუმეობის დარგის დამსახურებული მუშაკი.

წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.291