როგნედა ღამბაშიძე

დაბადების ადგილი: ქ. ზესტაფონი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1943 წელს; ასპირანტურა - 1946 წელს.

1946-1953წწ. მუშაობდა პუშკინის სახელობის თბილისის სახელმწიფო პედაგოგიურ ინსტიტუტში ჯერ უფროს მასწავლებლად, შემდეგ - ქართული ენის კათედრის გამგედ; 1955 წლიდან სიცოცხლის ბოლომდე ხელმძღვანელობდა ენათმეცნიერების ინსტიტუტის ქართული სამეცნიერო ტერმინოლოგიის განყოფილებას; 1949 წელს დაიცვა საკანდიდატო, 1988 წელს - სადოქტორო დისერტაცია. მის სამეცნიერო მოღვაწეობაში ორი ძირითადი მიმართულება გამოიკვეთა: ერთია ქართული სამეცნიერო ტერმინოლოგიის თეორიულ და პრაქტიკულ საკითხებზე მუშაობა, მეორე - ქართული დიალექტოლოგიის საკითხების კვლევა. მნიშვნელოვანია მისი წვლილი სხვადასხვა სამეცნიერო ტერმინოლოგიის შემუშავება-დახვეწის საქმეში. 40 წლის მანძილზე მისი ხელმძღვანელობით და რედაქტორობით შეიქმნა და დაიბეჭდა 35 სამეცნიერო ტერმინოლოგია: ტექნიკური, სოფლის მეურნეობის, ფიზიკის, იურიდიული, გეოგრაფიის, ქიმიის, მეტალურგიის, მართვის ავტომატიზებული სისტემების, რადიოელექტრონიკისა და მრავალი სხვა. ცალკე უნდა აღინიშნოს მისი გამოკვლევები სამეცნიერო ტერმინოლოგიის თეორიულ პრობლემებზე, მისი მონაწილეობა საერთაშორისო თუ რეგიონალურ თათბირებზე, კონფერენციებსა და სიმპოზიუმებში. როგნედა ღამბაშიძის თეორიული კვლევის შედეგები შეჯამებულია მონოგრაფიაში "ქართული სამეცნიერო ტერმინოლოგია და მისი შედგენის ძირითადი პრინციპები" (1986). განსაკუთრებულია მისი დამსახურება ქართული ენის ინგილოური დიალექტის შესწავლის საქმეში, რისი ღირსეული დაგვრიგვინებაც მისი "ქართული ენის ინგილოური ლექსიკონი" (1988) იყო. მასვე ეკუთვნის ორიგინალური სახელმძღვანელო "ქართული ენის თვითმსაწავლებელი".

სადოქტორო დისერტაციის თემა - "ქართული სამეცნიერო ტერმინოლოგია და მისი შედგენის ძირითადი პრინციპები", დაიცვა 1988 წელს.

წყარო: ქართული ენა: ენციკლოპედია. - თბ. 2008. - გვ.529-530; ენათმეცნიერების ინსტიტუტი: ice.ge

• არნოლდ ჩიქობავას სახელობის პრემია (პირველი ლაურეატი)
  გამოკვლევებისათვის ქართული სამეცნიერო ტერმინოლოგიის თეორიულ საკითხებზე და ქართულ დიალექტოლოგიაში
• გიორგი ნიკოლაძის სახელობის პრემია

• გეოფიზიკის ტერმინოლოგია = Геофизичксеая терминология : რუსულ-ქართული და ქართულ-რუსული (რედაქტორი). - თბილისი, მეცნიერება, 1988. - 279გვ.
• ქართული ენის ინგილოური კილოს ლექსიკონი (ავტორი). - თბილისი, განათლება, 1988. - 630გვ.
• ქართული სამეცნიერო ტერმინოლოგია და მისი შედგენის ძირითადი პრინციპები (ავტორი). - თბილისი, მეცნიერება, 1986. - 182გვ.
• მართვის ავტომატიზებული სისტემების ტერმინოლოგია (რედაქტორი). - თბილისი, მეცნიერება, 1977. - 90გვ.
• გეოგრაფიის ტერმინოლოგია = Географическая терминология : რუსულ-ქართული და ქართულ-რუსული (შემდგენელი). - თბილისი, მეცნიერება, 1967. - 206გვ.