ვიტალი ფრანგიშვილი

დაბადების ადგილი: ქ. ქუთაისი.

დაამთავრა საქართველოს პოლიტექნიკური ინსტიტუტის არქიტექტურული ფაკულტეტი არქიტექტურის სპეციალობით 1970 წელს.

1970-1978წწ. მუშაობდა სახელმწიფო საპროექტო ინსტიტუტ "საქქალაქმშენსახპროექტში" არქიტექტორად, ჯგუფის ხელმძღვანელად, პროექტის მთავარ არქიტექტორად; 1979-1997წწ. მუშაობდა ქ. მოსკოვში, იყო შპს "ტარდვა"-ს დირექტორი, ეწეოდა კერძო სამეწარმეო საქმიანობას სამშენებლო სფეროში, იყო მის მიერ დაფუძნებული საპროექტო ბიუროს ხელმძღვანელი; 1998-2006წწ. იყო ქ. თბილისის მერიის არქიტექტურის სამსახურის არქიტექტურულ გეგმარებითი დავალების ჯგუფის ხელმძღვანელი; 2007-2012წწ. იყო საკონსულტაციო ცენტრ "გეოგრაფიკის" ურბანისტი; 2012-2013წწ. არასამთავრობო ორგანიზაცია "დემოკრატიული მოძრაობა საქართველოში"-ს ექსპერტი, ასევე ქ. რუსთავისა და ქ. ფოთის ურბანული განვითარების სტრატეგიული გენგეგმის თანაავტორი; 2013-2014წწ. მუშაობდა არასამთავრობო ორგანიზაციების "სამოქალაქო საზოგადოების ინსტიტუტი"-ს და მდგრადი განვითარების ცენტრი "რემისის" ექსპერტად; ასევე იყო ქ. ბათუმის ურბანული განვითარების სტრატეგიული გეგმისა და ისტორიული ზონის განვითარების კონცეფციის ავტორი; 2015 წლიდან საქართველოს ტექნიკური უნივერსიტეტის მოწვეული პედაგოგია; ავტორია ურბანული პროექტების: ქ. მცხეთის დატალური დაგეგმარების გეგმის (1974-1975), ქალაქების: ბათუმის, სიღნაღის, ხაშურის, დუშეთის, ზუგდიდის, სამტრედიის, მარნეულის, ჩოხატაურის, ცაგერისა და ამბროლაურის განვითარების გენერალური გეგმების (1977-2007); თანაავტორია: საქართველოს განსახლების რეგიონული საქმის (1979), ძველი და ახალი გუდაურის, უძოს სპორტულ-სარეკრიაციო კომპლექსის განაშენიანების რეგულირების გეგმების, კურორტ გოდერძისა და ჰაწვალის განაშენიანების გენერალური გენგეგმების, მესტიის მუნიციპალიტეტის სივრცითი მოწყობის გეგმის და სხვა; მონაწილეობა აქვს მიღებული არქიტექტორულ კონკურსებში, კონფერენციებსა და სიმპოზიუმებში.

წყარო:საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 246

• საქართველოს დამსახურებული არქიტექტორი
  მრავალწლიანი წარმატებული პროფესიული შემოქმედებითი მოღვაწეობისათვის