გენადი ჩიქვანაია

დაბადების ადგილი: ქ. ფოთი.

დაამთავრა ქ. მოსკოვის წყალთამეურნეობის საინჟინრო ინსტიტუტის ჰიდროტექნიკური ფაკულტეტი და მიენიჭა ინჟინერ-ჰიდროტექნიკოსის კვალიფიკაცია 1959 წელს.

1959 წელს მუშაობა დაიწყო სამშენებლო ტრესტ "კოლხიდმშენის" სისტემაში, აფხაზეთის სამშენებლო სამმართველოს მშენებელ ოსტატად, შემდეგ მუშაობდა სსრკ საშუალო მანქანათმშენებლობის სამინისტროს ს/ყ №0908 ქ. სოხუმის სამშენებლო სამმართველოს ინჟინრად; 1970-1976წწ. მუშაობდა სოხუმის საქალაქო საბჭოს აღმასკომის კაპიტალური მშენებლობის განყოფილების უფროსად და აფხაზეთის ავტონომიური რესპუბლიკის მინისტრთა საბჭოს კაპიტალური მშენებლობის განყოფილების გამგედ; 1977-1985წწ. მუშაობდა აფხაზეთის ავტონომიური რესპუბლიკის პარტიულ და საბჭოთა ორგანოებში; იყო საქართველოს კპ აფხაზეთის საოლქო კომიტეტის კაპიტალური მშენებლობის განყოფილების გამგე და სოხუმის საქალაქო საბჭოს აღმასკომის თავმჯდომარის მოადგილე, შემდეგ პირველი მოადგილე; 1985 წელს გადაყვანილ იქნა აფხაზეთის ავტონომიური რესპუბლიკის კაპიტალური მშენებლობის სამმართველოში, სადაც მუშაობდა ჯერ მთავარ ინჟინრად, შემდეგ სამმართველოს უფროსად; 1992-1993წწ. აფხაზეთში განვითარებული მოვლენების შემდეგ საცხოვრებლად გადავიდა რუსეთის ფედერაციის ტვერის ოლქში, სადაც 1994 წლიდან მუშაობდა ხე-ტყის გადამამუშავებელი სააქციო საზოგადოების დირექტორად; დიდი წვლილი მიუძღვის, 1977-1992წწ. პერიოდში აფხაზეთის ავტონომიური რესპუბლიკის სამშენებლო სფეროს განვითარების საქმეში; მისი მონაწილეობითა და ხელმძღვანელობით, აფხაზეთის ავტონომიური რესპუბლიკის ტერიტორიაზე, განხორციელდა მრავალი სამრეწველო, კულტურულ-საგანმანათლებლო, კომუნალური მეორნეობისა და სხვა ინფრასტრუქტურული დანიშნულების მნიშვნელოვანი ობიექტების მშენებლობა; მრავალწლიანი წარმატებული შრომითი საქმიანობისა და დამსახურებისათვის მიღებული ჰქონდა სახელმწიფო და საუწყებო ჯილდოები, მათ შორის: აფხაზეთის უმაღლესი საბჭოს პრეზიდიუმის "საპატიო სიგელი", აფხაზეთის დამსახურებული ინჟინრის წოდება.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 280-281

• მედალი "შრომითი წარჩინებისთვის"
• შრომის ვეტერანი