ანზორ ჩიქობავა

დაბადების ადგილი: ქ. ქუთაისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამთოსაწარმოთა მშენებლობის სპეციალობით და მიენიჭა ინჟინერ-მშენებლის კვალიფიკაცია 1960 წელს.

1960-1963წწ. მუშაობდა საპროექტო ინსტიტუტ "საქგიპროშახტში" უფროს ინჟინრად; 1964 წელს სახელმწიფო საპროექტო ინსტიტუტ "საქსახპროექტში" უფროს ინჟინრად; 1965-1971წწ. მუშაობდა ქ. თბილისის ზონალურ სამეცნიერო-კვლევით, ტიპური და ექსპერიმენტალური პროექტირების ინსტიტუტში ("თბილზნიეპი") - უფროს ინჟინრად, ექსპერიმენტული პროექტირების ჯგუფში, შემდეგ ჯგუფის ხელმძღვანელად და პროექტის მთავარ კონსტრუქტორად არქიტექტურულ სახელოსნოში; 1972-1975წწ. მივლინებული იყო ირანის რესპუბლიკაში ქ. თეირანის ქალაქმშენებლობის ჯგუფში, საბჭოთა კავშირის სპეციალისტებთან ერთად; 1975 წლიდან, საქართველოში დაბრუნების შემდეგ, კვლავ აგრძელებს მუშაობას ქ. თბილისის ზონალურ სამეცნიერო-კვლევით, ტიპური და ექსპერიმენტული პროექტირების ინსტიტუტში, სადაც დაინიშნა ინდუსტრიული სამშენებლო კონსტრუქციების განყოფილების უფროსად; 1982 წლიდან ინსტიტუტის მთავარ კონსტრუქტორად; 1985-1988წწ. მივლინებული იყო ავღანეთის რესპუბლიკაში ქ. ქაბულის ცენტრალურ სახელმწიფო საპროექტო ინსტიტუტში ჯგუფის ხელმძღვანელად; 1988-2004წწ. კვლავ აგრძელებს მუშაობას ქ. თბილისის ზონალურ სამეცნიერო-კვლევით, ტიპური და ექსპერიმენტული პროექტირების ინსტიტუტში მთავარ კონსტრუქტორად; 2005-2009წწ. მუშაობდა კონსტრუქტორ-ექსპერტად შპს "ბურჯი"-ს საპროექტო განყოფილებაში; 2009-2011წწ. ინჟინერ-კონსტრუქტორად შპს "ქართუ მენეჯმენტი"-ს საპროექტო განყოფილებაში; განსაკუთრებით აღსანიშნავია მისი დამსახურება სეისმომედეგი კონსტრუქციების დამუშავებასა და მათი მშენებლობაში დანერგვის საქმეში; მონაწილეობდა ქ. სპიტაკში მიწისძვრით დაზიანებული შენობების რეაბილიტაციის პროექტების ექსპერტიზაში; საჩხერის რაიონში და ქ. თბილისში მიწისძვრით დაზიანებული შენობა-ნაგებობების შემოწმებაში; იკვლევდა და ამუშავებდა სხვადასხვა მიზეზით დაზიანებული შენობა-ნაგებობების აღდგენა-გაძლიერების დოკუმენტაციას, მათ შორის ქ. თბილისში რუსთაველის სახელობის სახელმწიფო აკადემიური დრამატული და ზ. ფალიაშვილის სახელობის ოპერისა და ბალეტის სახელმწიფო აკადემიური თეატრების; მიღებული ჰქონდა ავღანეთის რესპუბლიკის მედალი და ორი საპატიო სიგელი, საქართველოს მიღწევათა გამოფენის პირველი ხარისხის საპატიო სიგელი, სსრკ მინისტრთა საბჭოს პრემია (1982, 1988), 1985 - სსრკ გამომგონებლის სამკერდე ნიშანი (1985) და სხვა; აქტიურად თანამშრომლობდა ქ. მოსკოვის სამშენებლო კონსტრუქციების ცენტრალური ს/კ ინსტიტუტის სამეცნიერო ჟურნალთან "სეისმომედეგი მშენებლობა, ნაგებობათა გაანგარიშება"; ავტორია 22 დანერგილი გამოგონების.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 281-282

• სსრკ სახალხო მეურნეობის მიღწევათა გამოფენა (ВДНХ) (ბრინჯაოს მედალი, 2)