აბესალომ ბეროშვილი

დაბადების ადგილი: ქ. სიღნაღი.

დაამთავრა საქართველოს პოლიტექნიკური ინსტიტუტი სპეციალობით სამრეწველო თბოენერგეტიკა 1967 წელს.

1968 წლიდან მუშაობს საქართველოს პოლიტექნიკური ინსტიტუტის თბოტექნიკის კათედრაზე. 1992 წელს მოხდა სამეცნიერო-საწარმოო გაერთიანება  "მიონი"-ს გადაიარაღება მის მიერ დანერგილი ვაკუმური დამჭერებით, რამაც საწარმოს დაუზოგა ყოველწლიურად ასეული ათასობით მანეთი, ამავე პერიოდს ემთხვევა მის მიერ შექმნილი უნიკალური დგუშ-ცილინდრის ჯგუფი მინიმალური დანაკარგებით ხახუნზე და პრიორიტეტული დონის მაგნიტო-ელექტრული წინსვლით-უკუსვლითი ამძრავი. ამ და სხვა გამოგონებების ბაზაზე შემუშავებული იქნა მთელი რიგი მანქანებისა არსებულ დონეს მნიშვნელოვნად აღმატებული მახასიათებლებით, რაც არ დარჩა სამხედრო-სამრეწველო კომპლექსის ყურადღების მიღმა. შესაბამისად ა. ბეროშვილის ხელმძღვანელობით ჩამოყალიბდა ორი დარგობრივი ლაბორატორია, რომელმაც შექმნა ახალი ტექნიკის არაერთი წარმატებული ნიმუში. მრავალჯერდი მოქმედების კოსმოსური ხომალდის "ბურან"-ის ენერგომომარაგების სისტემაში გამოყენებული იყო მის მიერ შექმნილი თხევადი ჟანგბადის კომპაქტური და უაღრესად ენერგოეფექტური ტუმბო, კოსმოსური ხომალდისთვის მაღალეფექტური კრიოგენული სიცივის გენერატორების შექმნის შემდეგ საქართველოს პოლიტექნიკური ინსტიტუტის ლაბორატორიას მიენიჭა საბჭოთა კავშირში კოსმოსური კრიოგენიკის დარგში სათავო  ორგანიზაციის სტატუსი; 1997-1998წწ. თბოფიზიკის კათედრის გამგე და სამეცნიერო ცენტრის ხელმძღვანელი. კოსმოსური ტექნიკის განვითარებისთვის მიღებული აქვს აკად. კორალიოვის სახელობის მედალი. ტექნიკურ მეცნიერებათა კანდიდატი (1974), ტექნიკურ მეცნიერებათა დოქტორი (1984).

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი,. 2016.- გვ. 42; საქართველოს მეცნიერებისა და ტექნიკის დარგის სახელმწიფო პრემიის ლაურეატები 1993-2004 წწ. . -თბ., 2012.-გვ.110

• საქართველოს საინჟინრო აკადემია, აკადემიკოსი

• 1986 - საქართველოს სახელმწიფო პრემია (ერთობლივი გამარჯვება)
  1992-1997 წლებში შესრულებული სამუშაოსათვის - "ეფექტიანი ავტოგაზგასამართი საკომპრესორო სადგური ახალი თაობის კომპრესორებით"