კახაბერ ცნობილაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის ქიმიური და ლითონების ტექნოლოგიის ფაკულტეტის საღამოს დასწრებული განყოფილება და მიენიჭა ინჟინერ-ტექნოლოგის კვალიფიკაცია 1990 წელს.

უმაღლეს სასწავლებელში სწავლის პარალელურად მუშაობდა ერთ-ერთ მექანიზაციის სამმართველოში, დამხმარე მუშად, გეოდეზიის სამსახურში; 1984-1985წწ. გაიწვიეს საბჭოთა არმიის რიგებში, სავალდებულო სამხედრო სამსახურში; 1986-1988წწ. მუშაობდა მცხეთის რაიონის სოფ. წიწამურის საკარიერო სამმართველოს ჯერ მემანქანე-ოპერატორად, შემდეგ ამავე სამმართველოს ერთ-ერთი საამქროს ოსტატად; 1989 წელს დაიწყო მუშაობა საქართველოს მშენებლობის სამინისტროს მექანიზაციის სპეციალიზებული ტრესტის მექანიზაციის სპეციალიზებულ სამმართველოში ბურღვით-ნატენი და დასარტყამი ხიმინჯების უბნის უფროსად; 1990 წელს ზემოაღნიშნული სამმართველოს რეორგანიზაციის შემდეგ დააარსა შპს "დიდოსტატი", რომლის დირექტორად მუშაობს; შპს "დიდოსტატის" ძირითადი საქმიანობის სფეროს წარმოადგენს ხელოვნური ფუძე-საძირკვლების მოწყობა სხვადასხვა დანიშნულების შენობა-ნაგებობებისათვის; მის მიერ სისტემატურად ხორციელდება თანამედროვე საბურღი აგრეგატებისა და მოწინავე ტექნოლოგიების დანერგვა მშენებლობაში; 2005 წელს პირველად საქართველოში დაიწყო თანამედროვე საბურღი აგრეგატის "Bauer BG 28"-ის; 2019 პირველად დაინერგა ახალი ტექნოლოგია - ხიმინჯების ჩაწნეხვით მოწყობა; მისი ხელმძღვანელობით კომპანია "დიდოსტატის" მონაწილეობით, შესრულებულ იქნა ხიმინჯოვანი ფუძე-საძირკვლების სამუშაოები მრავალი მნიშვნელოვანი საცხოვრებელი კომპლექსებისა და საზოგადოებრივი დანიშნულების ობიექტების მშენებლობაზე; მათ შორის: იუსტიციის სახლის ქ. თბილისში, საცხოვრებელ კომპლექს "მაგნოლიას" ქ. ბათუმში, სასტუმრო "პარაგრაფის კომპლექსის დ. შეკვეთილში, "ბაქო-კარწახი-ყარსის" რკინიგზისა და საქართველოს ავტობანის ხელოვნური საინჟინრო ნაგებობების და სხვა; მონაწილეობა აქვს მიღებული სხვადასხვა საერთაშორისო სამეცნიერო-ტექნოლოგიურ კონფერენციებსა და სიმპოზიუმებში, პრაქტიკულ მასტერ-კლასებში; მისი ხელმძღვანელობით კომპანია "დიდოსტატი" მუდმივად ანვითარებს თავის საქმიანობას ბურღვის თანამედროვე ტენდენციებისა და ტექნოლოგიების კვალდაკვალ; თანამშრომლობს დარგის მოწინავე და წარმტებულ საერთაშორისო ფირმებთან და სამშენებლო კომპანიებთან; მრავალწლიანი წარმატებული შრომითი საქმიანობისა და დამსახურებისათვის მიღებული აქვს საუწყებო ჯილდოები, დიპლომები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 294-295