ვლადიმერ ცნობილაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტის საღამოს დასწრებული განყოფილება სამრეწველო და სამოქალაქო მშენებლობის სპეციალობით და მიენიჭა ინჟინერ-მშენებლის კვალიფიკაცია 1968 წელს.

უმაღლეს სასწავლებელში სწავლის პარალელურად მუშაობდა საქართველოს მშენებლობის სამინისტროს მსხვილპანელოვანი ბინათმშენებლობის №15 სამშენებლო-სამონტაჟო ტრესტის სისტემაში კოშკურა ამწის მემანქანედ, შემდეგ სამუშაოთა მწარმოებლად; 1972 წლიდან მუშაობდა საქართველოს მშენებლობის სამინისტროს მექანიზაციის სპეციალიზებული ტრესტის სპეციალიზებულ მექანიზაციის სამმართველოში ბურღვით-ნატენი და დასარტყამი ხიმინჯების უბნის უფროსად, სამმართველოს მთავარ ინჟინრად და შემდეგ სამმართველოს უფროსად; დიდი ღვაწლი მიუძღვის ბურღვით ნატენი ხიმინჯების გამოყენებით, საქართველოში ხელოვნური ფუძე-საძირკვლების მოწყობის მოწინავე და მაღალი ტექნოლოგიური მეთოდის დანერგვის საქმეში და ითვლება, საქართველოს მასშტაბით, ამ მეთოდის მშენებლობაში გამოყენების ერთ-ერთ ფუძემდებლად; მრავალწლიანი ნაყოფიერი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 296