გივი ხუციშვილი

დაბადების ადგილი: ქ. თელავი.

დაამთავრა საქართველოს პოლიტექნიკური ინსტიტუტი მცირე და საშუალო ჰიდროელექტროსადგურების მშენებლობის სპეციალობით და მიენიჭა ინჟინერ-ჰიდროტექნიკოსის კვალიფიკაცია 1954 წელს.

1954-1955წწ. მუშაობდა საქართველოს მელიორაციისა და წყალთა მეურნეობის სამინისტროს, ჯერ ალაზნის სისტემური სამმართველოს ინჟინერ-ჰიდროტექნიკოსად, ხოლო შემდეგ თელავის სისტემური სამმართველოს ინსტრუქტორად; 1956 წელს დაინიშნა თელავის სისტემური სამმართველოს უფროსად; 1960 წელს გადაყვანილ იქნა საქართველოს წყალთამეურნეობის სამინისტროს ცენტრალურ აპარატში უფროს ინჟინრად; 1963 წელს არჩეულ იქნა თელავის სახალხო დეპუტატთა რაისაბჭოს აღმასკომის თავმჯდომარე; 1964 წელს დაინიშნა საქართველოს მელიორაციისა და წყალმეურნეობის სამინისტროს მექანიზაციის განყოფილების უფროსად; 1967 წელს გადაყვანილ იქნა ამავე სამინისტროს მექანიზაციის სპეციალიზებული ტრესტის მმართველად; 1972 წელს დაინიშნა საქართველოს მელიორაციისა და წყალთამეურნეობის სამინისტროს სამშენებლო ტრესტ "ალაზანმშენი"-ს მმართველად; 1976 წელს გადაყვანილ იქნა ამავე სამინისტროს საწარმოო-განმკარგულებელი სამმართველო უფროსად; 1982 წელს დაინიშნა საბჭოთა კავშირის წყალთამეურნეობის სამინისტროს საქართველოს მთავარი საწარმოო-სამშენებლო სამმართველოს "საქმთავარწყალმშენის" უფროსის მოადგილედ, ხოლო აღნიშნული სამმართველოს რეორგანიზაციის შემდეგ, 1988 წლიდან იყო საქართველოს მინისტრთა საბჭოსთან არსებული საწარმოო-სამშენებლო გაერთიანება "საქმთავარწყალმშენი"-ს უფროსის მოადგილე; დიდი წვლილი აქვს შეტანილი საქართველოს მელიორაციისა და წყალთამეურნეობის სფეროს განვითარების საქმეში; მისი უშუალო მონაწილეობითა და ხელმძღვანელობით განხორციელდა საქართველოს კახეთის რეგიონის სასოფლო-სამეურნეო მიწების სარწყავი სისტემების მშენებლობა.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 328

• შრომის ვეტერანი
• საპატიო ნიშნის ორდენი
• მედალი "შრომითი წარჩინებისთვის"
  მრავალწლიანი შრომითი საქმიანობისა და დამსახურებისათვის