თენგიზ დაუშვილი

დაამთავრა რუსთაველის სახელობის სახელმწიფო თეატრალური ინსიტიტუტის სამსახიობო ფაკულტეტი 1960 წელს.

1960 წელს მუშაობას იწყებს გორის გ. ერისთავის სახელობის სახელმწიფო თეატრში რეჟისორ ლილი იოსელიანის ხელმძღვანელობით; ამ პერიოდში მსახიობმა შექმნა მრავალი საინტერესო სახე: მუშა (მ. ჯავახიშვილის "არსენა მააბდელი"), ტულიო (გოლდონის "ცეკვის მასწავლებელი"), ყაფლანი (გ. ნახუცრიშვილის "ნაცარქექია"), ნოე (რ. ნეშის "წვიმის გამყიდველი"), სიმონიკა (გ. სუნდუკიანის "პეპო") და სხვა; 1961 წელს მუშაობას იწყებს თბილისის სანიტარული კულტურის თეატრში სადაც ლილი იოსელიანის ხელმძღვანელობით ყალიბდება ახალგაზრდული დასი, ამ პერიოდის სპექტაკლებიდან აღსანიშნავია: ირაკლი (ლ. იოსელიანის "ჩვენი ერთი საღამო"), მედვედევი (რ. მამულაშვილის "თორტიზელები", ვლადიმერი (ვ. კოროსტილევის "მე მჯერა შენი"), ბუგროვი ("კოლეგები") და სხვა; თეატრში მუშაობის პარალელურად მსახიობი თ. დაუშვილი დაკავებული იყო კინოსტუდია "ქართულ ფილმში", სადაც მრავალი საინტერესო სახე შექმნა; გოჩა ("ზღვის შვილები"), კუკური ("მე, ბებია, ილიკო და ილარიონი"), გრიფიტი ("დრო იწურება განთიადისას"), რეზო ("გიორგობისთვე"), კაპიტანი ("უყაიმო თამაში"); 1968 წლიდან მუშაობას იწყებს რუსთავის სახელმწიფო დრამატულ თეატრში, სადაც შექმნა სახეთა მთელი გალერეა: შტრაუბე ("მაესტრო"), ტრიგორინი ("თოლია"), ამილკარი ("დამქირავებელი") და მრავალი სხვა; მათ შორის აღსანიშნავია 1979 წელს უნგრელი რეჟისორის ენდრე მარტონის მიერ დადგმული მ. საბოს პიესა - "ის ლამაზი მზიანი დღე". სპექტაკლს მაღალი შეფასება მისცეს როგორც ქართველმა, ისე უნგრელმა კრიტიკოსებმა. თ. დაუშვილი სისტემატურად მონაწილეობდა რადიო და ტელედადგმებში, იგი იყო რუსთავის დრამატული თეატრის სამხატვრო საბჭოს წევრი.

• 1980 - საქართველოს დამსახურებული არტისტი
  ნაყოფიერი შემოქმედებითი მოღვაწეობისთვის