თამარ შიუკაშვილი

დაბადების ადგილი: ქ. თელავი.

დაიბადა ცნობილი პედაგოგისა და მწიგნობრის ივანე შიუკაშვილის ოჯახში. დაამთავრა თელავის წმინდა ნინოს სასწავლებელი და 1903 წელს გამოსაცდელი ვადით ჩაირიცხა თელავის სასულიერო სასწავლებელში, სადაც 1904 წელს პედაგოგის წოდება მიიღო.

თამარ შიუკაშვილი 50 წლის მანძილზე თელავის სკოლების დაწყებით კლასებში ასწავლიდა. იგი იყო დაწყებითი და საშუალო სკოლების სახელმწიფო სამეცნიერო კომიტეტის მეცნიერ-კონსულტანტი. 1941 წელს გამოიცა მისი ნაშრომი თემაზე: "ანბანის წინა პერიოდი". დაინტერესებული იყო თეატრალური ხელოვნებით, მას ახლო ურთიერთობა ჰქონდა ლადო მესხიშვილთან, ვალერიან გუნიასთან, ალექსანდრე სუმბათაშვილთან, მიხეილ ჯავახიშვილთან და სხვა გამოჩენილ საზოგადო მოღვაწეებთან. თელავის მხარეთმცოდნეობის მუზეუმის არქივში დაცულია მიხეილ ჯავახიშვილის ოთხი წერილი, რომლის ადრესატი "მოდპიკის" საზოგადოების თელაველი რწმუნებული თამარ შიუკაშვილი გახლდათ. აი ერთ-ერთი მათგანი: "მოდპიკის აგენტს ქ. თელავში ქალბ. თამარ შიუკიაშვილს!  ამასთან ერთად გიგზავნით ქართველი დრამატურგებისა და კომპოზიტორთა საზოგადოების წევრთა სიას და გაუწყებთ, რომ "მოდპიკის" გამგეობის თანხმობით მათი ინტერესების დაცვა მინდობილი გვაქვს მე და თქვენ - "მოდპიკის აგენტებს". დაცვის ფორმაც და შინაარსიც ისეთივეა, როგორც "მოდპიკში", ოღონდ ერთი განსხვავებით: ქართული საზოგადოების ანგარიშები უნდა ცალკე შეადგინოთ. "მოდპიკის" რწმუნებული მიხ. ჯავახიშვილი". ცნობილი დრამატურგის, ნიკო შიუკაშვილის და.

წყარო: ქალთა განათლების კერები თელავში / მარინე გოგბაიძე, გიორგი ჯავახიშვილი.- თბ., 2020.-გვ.81

• ქართველთა შორის წერა-კითხვის გამავრცელებელი საზოგადოების თელავის განყოფილება, წევრი

• 1939 - საქართველოს დამსახურებული პედაგოგი

• ბავშვთა სიტყვიერი რეაქციების ტიპები სოციალურ ყოფაქცევაში (ავტორი). - ტფილისი, სახელგამის 1-ლი სტ., 1931. - 11გვ.