სერგო ასლანიშვილი

დაბადების ადგილი: ქ. როსტოვი, რუსეთის ფედერაცია.

დაამთავრა ნიკო ნიკოლაძის სამხატვრო ტექნიკუმი 1944 წელს; თბილისის სამხატვრო აკადემიის ფერწერის ფაკულტეტი.

ოჯახი მალე დაბრუნდა მშობლიურ ქალაქ თელავში და პატარა სერგო თელავის შურღაიას სასწავლებელში მიიყვანეს (დღევანდელი მე-4 საჯარო სკოლა). გარკვეული პერიოდის შემდეგ საცხოვრებლად თბილისში გადავიდნენ, სადაც სწავლა 27-ე სკოლაში განაგრძო. სერგო მეოთხე კლასში იყო, როდესაც შექმნა ტრამვაის მაკეტი. მისი ნიჭი ადრევე იქნა აღმოჩენილი და პედაგოგთა რეკომენდაციით, მშობლებმა სამხატვრო ტექნიკუმში შეიყვანეს, რომელსაც შემდგომ ნიკო ნიკოლაძის სახელი მიენიჭა; 1942 წელს, სამამულო ომის დროს, მესამეკურსელი სერგო ასლანიშვილი ჯარში გაიწვიეს, სადაც პლაკატებსა და ლოზუნგებს აფორმებდა; მას "ფერების ოსტატს" უწოდებდნენ; აკადემიის დასრულების შემდეგ, მიუხედავად აკადემიის ლექტორად დარჩენის შეთავაზებისა, სერგო ასლანიშვილი მშობლიურ ქალაქს დაუბრუნდა, სადაც სახვითი ხელოვნების წრე გახსნა და დიდ წარმატებებს მიაღწია; 1962 წელს დააფუძნა ელენე ახვლედიანის სახელობის სამხატვრო სკოლა, რომლის დირექტორიც იყო 2006 წლამდე; პედაგოგიურ საქმიანობას 2008 წლამდე ეწეოდა; მხატვრის პირველი პერსონალური გამოფენა 1952 წელს მოეწყო. მისი ნამუშევრები დაცულია საქართველოს მხატვართა ფონდში, წინანდლისა და თელავის მუზეუმებში; 2001 წელს მიწვეული იყო საფრანგეთში, სადაც წარმოდგენილ გამოფენაზე მისი ყველა ნამუშევარი გაიყიდა. ფერწერული ტილო "საზამთროები" ინახება საფრანგეთში - ჟაკ შირაკის კოლექციაში. 2019 წლის 19 თებერვალს ელენე ახვლედიანის სახელობის სამხატვრო სკოლის ფასადზე მხატვრის მემორიალური დაფა გაიხსნა. ქართველი ფერმწერი.