აკოფ ჰოვნათანიანი

დაბადების ადგილი: ქ. თბილისი.

აკოფ ჰოვნათანიანი, სომეხ მხატვართა ოჯახის წარმომადგენელი - მიკირტუმ ჰოვნათანიანის შვილი. თბილისური პორტეტული სკოლის ერთ-ერთი მნიშვნელოვანი წარმომადგენელი, მოღვაწეობდა თბილისში. სწავლობდა თავის მამასთან მიკირტუმ ჰოვნათანიანთან. 1841 წელს საქართველოს მთავარმართებლის ე. გოლოვინის პორტრეტისათვის პეტერბურგის სამხატვრო აკადემიამ უკლასო (თავისუფალი) მხატვრის წოდება მიანიჭა. მისი პორტრეტებისათვის დამახასიათებელია თავშეკავებული კოლორიტი, ფიგურათა სტატიკურობა, პოზათა სიმშვიდე, დეტალიზაცია. მისი ნამუშევრებია: ნ. თუმანიანის, ე. გურგენბეკიანის (სომხეთის სურათების გალერეა, ერევანი), გ. კარაჯიანის (აღმოსავლეთის ხალხთა ხელოვნების მუზეუმი, მოსკოვი), მელიქიშვილების, მიზანდარის (საქართველოს ხელოვნების მუზეუმი, თბილისი)  პორტრეტები. ნიუ-იორკის თანამედროვე ხელოვნების მუზეუმს მუდმივ დაცვაში გადაეცა სერგო ფარაჯანოვის ფილმი "ჰაკობ ჰოვნათანიანი" (სომხეთი, 1967, ეს პირველი სომხური ფილმია, რომელმაც თავისი ღირსეული ადგილი დაიკავა მსოფლიო მნიშვნელობის ორ მთავარ ხელოვნების ცენტრში – MoMA-სა და Pompidou-ში). ფერმწერი, გარდაიცვალა ირანში.

წყარო: ქართული საბჭოთა ენციკლოპედია, ტ. 11, თბ., 1987. — გვ. 677