ანდრო კიკნაველიძე

დაბადების ადგილი: სოფელი კიკნაველეთი (ახლანდელი საკრაულა), ბაღდათის მუნიციპალიტეტი.

დაამთავრა საქართველოს სასოფლო-სამეურნეო ინსტიტუტის აგროეკონომიკის ფაკულტეტი 1953 წელს.

1954–1960წწ. მუშაობდა ჩაის მრეწველობის საკავშირო სამეცნიერო-კვლევითი ინსტიტუტის (ანასეული) ეკონომიკის განყოფილების გამგედ; 1960–1963წწ. საქართველოს სოფლის მეურნეობის ეკონომიკისა და ორგანიზაციის სამეცნიერო-კვლევითი ინსტიტუტის განყოფილების გამგედ; 1966–1973წწ. დირექტორის მოადგილედ სამეცნიერო ნაწილში; 1963–1966წწ. სახალხო მეურნეობის ეკონომიკის და დაგეგმვის სამეცნიერო-კვლევითი ინსტიტუტის განყოფილების გამგედ; 1973–1981წწ. საქართველოს სახელმწიფო საგეგმო კომიტეტის თავმჯდომარის პირველ მოადგილედ; 1981–2001წწ. საქართველოს სახელმწიფო აგრარულ უნივერსიტეტში აგროსამრეწველო საწარმოთა ორგანიზაციის კათედრის გამგედ; 2001–2006წწ. პროფესორის თანამდებობაზე. მისი სამეცნიერო ნაშრომები ეძღვნება საქართველოს სოფლების ეკონომიკისა და სოციალური განვითარების თეორიისა და პრაქტიკის, აგრეთვე სასოფლო-სამეურნეო წარმოების ეკონომიკის, ორგანიზაციის, მართვისა და დაგეგმვის საკითხებს. ავტორია მრავალი სამეცნიერო ნაშრომის, მონოგრაფიებისა და სახელმძღვანელოების. მიღებული აქვს სახელმწიფო ჯილდოები. ეკონომიკის მეცნიერებათა დოქტორი (1972), პროფესორი (1976), აგროეკონომისტი.

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge;  საქართველო: ენციკლოპედია: ტ.5. -თბ.,2023. -გვ. 27-28

• საქართველოს სოფლის მეურნეობის მეცნიერებათა აკადემია, წევრ-კორესპონდენტი (1991-)
• საქართველოს სოფლის მეურნეობის მეცნიერებათა აკადემია, ნამდვილი წევრი (1992-)

• 1998 - ღირსების ორდენი
• 1985 - საქართველოს მეცნიერებათა დამსახურებული მოღვაწე

• თოხის მუშიდან აკადემიკოსობამდე (ავტორი). - თბილისი, 2003. - 119გვ.
• წარმოების ორგანიზაცია და დაგეგმვა სასოფლო-სამეურნეო საწარმოებში და გაერთიანებებში : დამხმ. სახელმძღვ. მთ. ეკონომისტების კვალიფიკაციის ამაღლების კურსების მსმენელებისათვის (თანაავტორი). - თბილისი, 1987. - 142გვ.
• საკოლმეურნეო წარმოების ამაღლების პრობლემები საქართველოში (ავტორი). - თბილისი, საბჭოთა საქართველო, 1971. - 286გვ.