ამირან რაზმაძე

დაბადების ადგილი: სოფელი აჩაბეთი, ქურთის მუნიციპალიტეტი.

დაამთავრა საქართველოს პოლიტექნიკური ინსტიტუტი.

ინსტიტუტში სწავლისას გაიარა სამხედრო კათედრა, შემდეგ 3 თვით კოჯორში მსახურობდა. მშენებელი ინჟინერი იყო. მუშაობდა ცხინვალის სამშენებლო ტრესტში, დაიწყო განყოფილების გამგედ, შემდეგ გორის მესამე სამშენებლო ტრესტში გადავიდა, შემდეგ – საბინაო ტრესტში, მუშაობდა ნიქოზშიც მიწათმომწყობად, დაღუპვამდე ბოლო სამი წელი კი გორის ბაზაზე გაატარა; ბოლოს სოფელში ჰესის აშენება უნდოდა, პროექტი შეადგინა, ის პროექტი ჩეხეთში გაგზავნეს და გაიმარჯვა კიდეც, მაგრამ ვერ მოასწრო. ამირან რაზმაძე გორის ჯავშან-სატანკო ბაზაზე სამშენებლო მასალების აღრიცხვის ინსპექტორი იყო და რუსებმა მას მერე მოკლეს, რაც ფხვენისში ქართველ მეომრებს წყალი მიუტანა და შინ შეიარა, ცოლი რომ სამშვიდობოს გამოეყვანა. 11 აგვისტოს ღამეს ცოლ-ქმარი ცდილობდა კარსმომდგარი მტრისთვის მანქანით დაეღწიათ თავი. სოფელ საქაშეთის გადასახვევთან ტანკს შეეჯახნენ და აფეთქდნენ; ცოლი გადარჩა, ამირან რაზმაძე ადგილზე დაიღუპა, მხოლოდ პატრიარქის შესვლის შემდეგ მოხერხდა მისი გადმოსვენება. სამოქალაქო პირი.

წყარო: გმირი : 2008 წლის აგვისტოს ომში დაღუპული ჯარისკაცების ხსოვნისადმი მიძღვნილი წიგნი: ნაწ. 1 / წიგნზე მუშაობდნენ: თორნიკე ყაჯრიშვილი, თამარ შარმიაშვილი, დავით ფაჩუაშვილი [და სხვ.].-თბ.,2010. გვ.247-248

• 2008 - მედალი "მხედრული მამაცობისთვის" (გარდაცვალების შემდეგ)