მოსე მეგრელიძე

დაბადების ადგილი: სოფელი ხრიალეთი, ოზურგეთის მაზრა.

1902 წლის იანვარში მეტეხის ციხეში გარდაიცვალა პოლიტიკური პატიმარი, გურიის, ერთ-ერთი სოფლის მასწავლებელი, მოსე მეგრელიძე, (რომელიც ადრე ფოთში ცნობილი იყო როგორც პროპაგანდისტი მუშა). თბილისიდან ის გურიაში გადაასვენეს. ამ შემთხვევის გამო, სოციალ-დემოკრატიულმა ორგანიზაციამ შემდეგი სააგიტაციო ფურცელი გამოუშვა: "აბა, გააცილეთ პატივცემულად კუბო, თბილისელებო, აბა, ღირსეულად დაუხვდით მას, გურულებო" (გრ. გიორგაძე, "თვითმპყრობელობა და რევოლუცია", თბ., 1930). მისი გამბედაობისა და რევოლუციონურობის შესახებ საარაკო ამბებს ჰყვებოდნენ გურიაში და მას სოციალ-დემოკრატიული ორგანიზაციის ერთ-ერთ დამაარსებლად თვლიდნენ. მოსე მეგრელიძე შესანიშნავი ორატორი იყო და ზეპირად იცოდა მარქსიზმი, დებატებში დიდ ცოდნას ამჟღავნებდა. პერიოდულ პრესაში აქვეყნებდა პუბლიცისტურ წერილებს სხვადასხვა საჭირბოროტო საკითხებზე.

წყარო: ქართველ მოღვაწეთა ლექსიკონი, 1801-1952: ტ. III მ-რ / იოსებ იმედაშვილი.-თბ.,2021.-გვ.197