ზაქარია მდივანი

დაბადების ადგილი: ქ. თბილისი.

დაამთავრა ტფილისის კადეტთა კორპუსი 1884 წელს, კონსტანტინეს სამხედრო სასწავლებელი 1886 წელს და გენერალური შტაბის აკადემია 1898 წელს (1-ი თანრიგით).

მსახურობდა ვარშავის საციხოვნო არტილერიაში და კავკასიის გრენადერთა საარტილერიო ბრიგადაში. აკადემიის დამთავრების შემდეგ ირიცხებოდა კავკასიის სამხედრო ოლქში. 1899 წელს გადაყვანილ იქნა გენერალურ შტაბში. 1899-1902 წლებში მსახურობდა კავკასიის სამხედრო ოლქის შტაბის უფროსი ადიუტანტის თანაშემწედ. 1902-1908 წლებში მსახურობდა ბათუმში, მიხეილის სიმაგრის შტაბის უფროსად. 1908- წელს დაინიშნა 39-ე ქვეითი დივიზიის შტაბის უფროსად. 1908-1910 წლებში მსახურობდა პოლკოვნიკად და მე-13 ქვეითი დივიზიის შტაბის უფროსად. 1910-1912 წლებში მსახურობდა სევასტოპოლის სიმაგრის შტაბის უფროსად.  1912-1915 წლებში მსახურობდა ლაიბ-გვარდიის მე-13 ერივანსკის პოლკის მეთაურად. 1913 წელს დაინიშნა იმპერატორის ფლიგელ-ადიუტანტად.  1915 წელს ჩაირიცხა იმპერატორ ნიკოლოზ II-ს ამალაში. შედიოდა იმპერატორის უახლოეს გარემოცვაში. 1915 წელს ირიცხებოდა კავკასიის არმიის მთავარსარდლის განკარგულებაში. 1915-1917 წლებში მსახურობდა კავკასიის მე-IV საარმიო კორპუსის შტაბის უფროსად. 1917-1918 წლებში მსახურობდა 39-ე ქვეითი დივიზიის უფროსად, კავკასიის სამხედრო ოლქის მთავარ უფროსად, ბათუმის ციხის შტაბის უფროსად, ბათუმის სამხედრო კომენდანტად და ბათუმის ოლქში განლაგებულ ყველა ჯარების უფროსად. 1918-1921 წლებში მსახურობდა ქართულ ჯარში. ღებულობდა აქტიურ მონაწილეობას მის ორგანიზაციაში. ერთხანს იყო ქართული არმიის მთავარსარდალი. 1921 წლიდან ცხოვრობდა ემიგრაციაში, ჯერ თურქეთში, შემდეგ საფრანგეთში - პარიზში, იყო "ლაიბ-ერევნელების" თავმჯდომარე, თავის თავს უწოდებდა თავადს, მაგრამ რუსეთის იმპერიაში და არც საქართველოს სამეფოში ეს გვარი არასოდეს არ ოყო დამტკიცებული თავადის ხარისხში. გაერთიანებული სახელმწიფი პოლიტიკური სამმართველოს უცხოეთის განყოფილების (ИНО ОГПУ) ცნობით 1924 წლის 8 სექტემბერს იმყოფებოდა სტამბოლში და აპირებდა საქართველოში დაბრუნებას. პოლკოვნიკი (1906), ქართველი გენერალ-მაიორი (1915).

წყარო: სამხედრო ფიცის ერთგულნი: ქართველი გენერლები.-თბ., 2015.-გვ.77; საქართველო: ენციკლოპედია: ტ.5. -თბ.,2023. -გვ.640

• 1916 - წმინდა ვლადიმირის II ხარისხის ორდენი
• 1916 - წმინდა ანას II ხარისხის ორდენი
• 1915 - წმინდა სტანისლავის I ხარისხის ორდენი (მახვილებით)
• 1911 - წმინდა ვლადიმირის III ხარისხის ორდენი
• 1908 - წმინდა ვლადიმირის IV ხარისხის ორდენი
• 1906 - წმინდა სტანისლავის II ხარისხის ორდენი
• 1904 - წმინდა ანას III ხარისხის ორდენი
• 1902 - წმინდა სტანისლავის III ხარისხის ორდენი