თინა ღვინაძე

დაბადების ადგილი: ქ. კასპი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1958 წელს; ამავე უნივერსიტეტის ასპირანტურა 1962 წელს.

უნივერსიტეტის დამთავრების შემდეგ მუშაობდა ქ. კასპის მე-2 საშუალო სკოლის ქართული ენისა და ლიტერატურის მასწავლებლად, ხოლო 1960 წლიდან – ლოგოპედადაც; 1963 წლიდან გარდაცვალებამდე მუშაობდა არნ. ჩიქობავას სახელობის ენათმეცნიერების ინსტიტუტის ქართული მეტყველების კულტურის განყოფილებაში ჯერ მეცნიერ-თანამშრომლად, შემდეგ უფროს მეცნიერ-თანამშრომლად, ხოლო 2009 წლიდან – მთავარ მეცნიერ-თანამშრომლად; მისი სტატიები ქართული სალიტერატურო ენის ნორმალიზაციის აქტუალურ საკითხებს მოიცავს; მასვე ეკუთვნის "ქართული სიტყვის კულტურის საკითხებისათვის" (VII წიგნი) მომზადებული 51 სიტყვა-სტატია; მონაწილეობდა "ჟურნალისტის სტილისტიკური ცნობარის" მოსამზადებელ სამუშაოებში; იყო არაერთი საკანდიდატო დისერტაციის ოპონენტი. მკვლევრის წერილები რეგულარულად იბეჭდებოდა ჟურნალში "ქართული ენა და ლიტერატურა სკოლაში" (და, რა თქმა უნდა, ინსტიტუტის სამეცნიერო ორგანოში "ქართული სიტყვის კულტურის საკითხები"). მას დეტალურად აქვს შესწავლილი საშუალო სკოლის ფიზიკის სახელმძღვანელოები მართლწერის თვალსაზრისით; საგულისხმო წერილები მიუძღვნა დ. ჩუბინაშვილის, ი. გოგებაშვილის, არნ. ჩიქობავას, ვ. თოფურიასა და ივ. გიგინეიშვილის ღვაწლს; მისი რედაქტორობით გამოიცა ბიბლიოგრაფიული ცნობარი "ქართული ენის სწავლება საშუალო სკოლაში" და ფ. ერთელიშვილის იგავების კრებული "ძალა და აღმართი", არნ. ჩიქობავასა და ვ. თოფურიას ბიბლიოგრაფიულ იშვიათობად ქცეული ნაშრომები. ბოლო წლებში თინა ღვინაძის თანაავტორობითა და რედაქტორობით გამოიცა შემდეგი ნაშრომები: "ჟურნალისტის ორთოგრაფიულ-სტილისტიკური ლექსიკონი", წიგნი I; "ჟურნალისტის ორთოგრაფიულ-სტილისტიკური ლექსიკონი", წიგნი II; "ქართული ენის პარონიმთა ლექსიკონი"; "სასკოლო ორთოგრაფიული ლექსიკონი"; "მოსწავლის ორთოგრაფიულ-სტილისტიკური ლექსიკონი". მან არაერთი საინტერესო წერილი მიუძღვნა ანასტასია ხოშტარია-ერისთავის პერსონაჟთა მეტყველებასა თუ მანანა ჩიტიშვილის პოეტური ენის საკითხებს. ავტორია 70-ზე მეტი სამეცნიერო შრომისა. ფილოლოგიურ მეცნიერებათა კანდიდატი.

საკანდიდატო დისერტაციის თემა - "ვნებითი გვარის ფორმათა სტილისტიკური ფუნქციები თანამედროვე ქართულში", დაიცვა 1988 წელს.

წყარო: იბერიულ-კავკასიური ენათმეცნიერება XLV / თსუ არნოლდ ჩიქობავას სახელობის ენათმეცნიერების ინსტიტუტი.-თბ.,2017.-გვ.252 (ice.ge); წიგნი ღირსებისა: ტ. 6/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.209

• 2001 - ღირსების მედალი

• ქართული ენის პარონიმთა ლექსიკონი (რედაქტორი). - თბილისი, 2011. - 310გვ.. - ISBN: 978-9941-0-3036-9
• ქართული ზმნის ვნებითი გვარის ფორმათა სტილისტიკა (ავტორი). - თბილისი, მეცნიერება, 1989. - 181გვ.