ნებისმიერი მეცნიერების არსებობის აუცილებელ პირობას მყარი ტერმინოლოგიური ბაზა წარმოადგენს. ქორეოგრაფიულ ხელოვნების მეცნიერული შესწავლის საბაზისო ტერმინს "ქორეოლოგია" წარმოადგენს.
სპეციალურ ლიტერატურაში მისი განმარტება იშვიათად გვხვდება, ამიტომ, მოცემულ ნაშრომში მისი დეფინიციის ერთ-ერთი ვარიანტია წარმოდგენილი: ქორეოლოგია - არის ხელოვნებათმცოდნეობის დარგი, რომელიც სწავლობს ქორეოგრაფიული ხელოვნების ისტორიას, თეორიას და ახდენს ქორეოგრაფიული ნიმუშის კრიტიკულ ანალიზს.
ქორეოლოგია, კრებითი ცნებაა, რადგან ცეკვის ყველა ნაირსახეობის მეცნიერულ შესწავლას მოიცავს, რომელიც ხალხური აუთენტური, სასცენო-ხალხური, ისტორიულ-ყოფითი, სამეჯლისო, კლასიკური და თანამედროვე ცეკვისადმი ისტორიულ, თეორიულ და კრიტიკულ მიდგომას გულისხმობს.