ანტისტროფი
NPLG Wiki Dictionaries გვერდიდან
ანტისტროფი − (ბერძნ. anti წინააღმდეგ და strophe – ტრიალი, ბრუნვა), ანტიკურ ტრაგედიაში ქოროს სიმღერის წყვილი სტროფი, რომელიც რიტმულად იმეორებს მის წინამორბედ (კენტ) სტროფს. ანტისტროფს თან ახლდა ქოროს რიტმული მოძრაობა მარცხნიდან მარჯვნივ (დასავლეთიდან აღმოსავლეთისაკენ), ხოლო სტროფს – შესაბამისი მოძრაობა მარჯვნიდან მარცხნივ. თუკი ქორო შედგებოდა ორი ნახევარქოროსაგან, ანტისტროფს ასრულებდა მეორე ნახევარქორო. ყოველი წყვილი სტროფის რიტმული მრავალსახეობა ანიჭებდა უფრო მეტ გამომსახველობას გმირთა განცდებს, სცენურ მოქმედებას. სტროფული და ანტისტროფული წყობის ნიმუშებია ქოროს სიმღერები ესქილეს „მიჯაჭვულ პრომეთეში“, სოფოკლეს „ოიდიპოს მეფეში“ (და სხვ.).
