ბერეთელი ნუკრი

ნუკრი ბერეთელი

ბერეთელი ნუკრი − (1981), ნამდვილი სახელი და გვარი − ნოდარ კვიჟინაძე. ქართველი პოეტი. დაიბადა სოფელ ბერეთისაში (ჭიათურა). 1999 წელს დაამთავრა ამავე სოფლის საშუალო სკოლა და ჩაირიცხა თსუ-ს ფიზიკის ფაკულტეტზე. 2003 წელს დაიცვა ბაკალავრის ხარისხი. 2004 წლიდან მუშაობს „მაღალი ტექნოლოგიების ეროვნულ ცენტრში”. გამოცემული აქვს ლექსების კრებული „ჩიხი” (2012).

მარტის (უმარტო) ლექსი

ვწევარ. კარს ზურგით აწვება ქარი

და ხველას ლადოს ლექსებით ვირჩენ.

ამაღამ თუკი ვერ მომისწარი,

დილამდე იქნებ ვერც გადაგირჩე.

მკერდში ისეთი დოღია ახლა,

ლაგამაწყვეტილ, ურა რაშების,

შენს შიშველ მხრებზე ნისლივით თალხად

გავიშლები და ნელა ავშრები.

მთებივით ახლოს რომ მაინც მყავდე...

ყოველ რიჟრაჟზე მთამსვლელურ ჟინით

ამოვყვებოდი შენს თვალთმაქც ავდრებს,

შენს ვნების ბორცვზე ამავალ ბილიკს,

მოვედებოდი ძუძუ-მკერდს ხანძრად,

მარტის კვირტივით დაბერილ კერტებს...

და ცამდე ასულს ზვავივით დამძრავს

გრძნობა, რომელსაც სხეულში ვერ ვტევ.

და გვალე-გვალე მიწისკენ მქროლავს

შენი ღიმილი თუ ამყრის ფარ-ხმალს,

შენი ბავშვივით უმანკო წოლა,

შენი წვივების სიცელქის ნახვა.

და სანამ ვნების მინავლულ კოცონს

ისევ აანთებ თვალების ფშვნეტით,

მაგ ყელზე ტკბილად მივნაბდავ კოცნებს,

რომ კიდევ ერთხელ ვიწამო ღმერთი.

წყარო

ქართველი პოეტები (ენციკლოპედია)