ბეტონის იატაკი
ბეტონის იატაკი − იატაკის გავრცელებული სახეობა. უპირატესი გამოყენება აქვს სამრეწველო დანიშნულების შენობებსა და სათავსებში, სადაც ფეხით მოსიარულეთა ინტენსიური მოძრაობაა ან დიდია ქიმიური და ტემპერატურული ზემოქმედება. ასეთები შეიძლება იყოს: საწყობები, ანგარები, სავაჭრო დარბაზები, მიწისქვეშა გადასასვლელები, ფაბრიკა-ქარხნების საამქროები და სხვ. იატაკის დაპროექტება ხდება დამკვეთის მოთხოვნების შესაბამისად.
ბეტონის იატაკის მოწყობა მიმდინარეობს მთელი ფართობის დამონოლითებით (თუ ფართობი მცირეა) ან პარალელური სექციების დამონოლითებით რამდენიმე ეტაპად (თუ ფართობი დიდია). შრეების მიხედვით შეიძლება იყოს ერთშრიანი ან მრავალშრიანი, დაარმირებული ან მის გარეშე. ზედა საექსპლუატაციო ფენა შემკვრივებულია ბეტონთან შედარებით მკვრივი მასალით (ცემენტის მოჭიმვა, პოლიმერი, თხევადი მინა, მოზაიკა და სხვ.).
