ენაბლუობა
ენაბლუობა - (F985), (stuttering (stammering)) მეტყველება ხასიათდება ბგერების, მარცვლების ან სიტყვების ხშირი გამეორებით ან გაწელვით, ან ხშირი პაუზებით, რაც მეტყველების რიტმს არღვევს. (ჯმო-ს ფსიქიატრიის ლექსიკონები)
ენაბლუობა (ენაბორძიკობა) მეტყველების რიტმისა და ჟღერადობის შეფერხებაა. მან შეიძლება სიტყვის ან მარცვლის გამეორების სახე მიიღოს, ან გამოვლინდეს მეტყველების შეწყვეტით. ენაბლუობა 4-ჯერ უფრო ხშირად გვხვდება ბიჭებში, ვიდრე გოგონებში. ეს პრობლემა, უფრო ხშირად, მეტყველების განვითარების საწყისი ეტაპისთვის ხანმოკლე დროის მანძილზეა დამახასიათებელი. ენაბორძიკი ბავშვების მხოლოდ 1%-ს სასკოლო ასაკშიც აღენიშნება ეს პრობლემა.
ენაბლუობის მიზეზი არ არის ცნობილი, მიუხედავად იმისა, რომ მრავალი თეორია არსებობს. სავარაუდოდ, სხვადასხვა შემთხვევას განსხვავებული მიზეზი აქვს. გენეტიკური ფაქტორები, ტვინის დაზიანება და შფოთვა მნიშვნელოვანი ფაქტორებია, მაგრამ ყველა შემთხვევაზე განზოგადება არ იქნებოდა სწორი. ენაბლუობა არაა დაკავშირებული ფსიქიკურ აშლილობებთან, მიუხედავად იმისა, რომ შეიძლება უხერხულობა და დისტრესი გამოიწვიოს. ბავშვების უმრავლესობა მკურნალობის გარეშეც ჩვეულებრივად იწყებს მეტყველებას. რეზისტენტულ შემთხვევებში ფსიქიატრიული მკურნალობის მრავალი მეთოდი გამოიყენება, მათ შორის, ფსიქოთერაპია და ბიჰევიორული თერაპია, თუმცა ეფექტურად არც ერთი არაა მიჩნეული. ყველაზე ხშირად მიმართავენ მეტყველების თერაპიას. (ოქსფორდის მოკლე სახელმძღვანელო ფსიქიატრიაში)
