ლიმონი ევრიკა
ლიმონი ევრიკა - ნახევრად ნაგალა მცენარეა, 3,5–4, 5 სიმაღლისა, კრონა სიგანით 2,5–3,5 მეტრამდეა, დაშლილი და სქელია, ფორმით ბურთისებრია. ტანის დიამეტრი დატოტვის ძირთან 10-14 სმ. აღწევს. ძირითადი ტოტები 4-5, მსხვილი და მაგარი, დამახასიათებელია მოკლე, უსწორ-მასწორო მუხლთაშორისები. ნორჩი ყლორტები იისფერია. ეკლები წვრილი და მახვილია, მაგრამ მცირე რაოდენობით, უფრო ხშირად უეკლოა. შეფოთვლა იცის ღარიბი. ფოთოლი მოგრძო დანისებრია. 11X5 სმ. მუქი მწვანე ფერის, ზედაპირი გლუვია, ყუნწი მოკლეა, 0,5–1,2 სმ. სიგრძისა, ბრტყელი ან მომრგვალო, ოდნავ კუთხოვანია.
საქართველოში ხშირად გვხვდება და ზოგან თვალსაჩინო ადგილიც უჭირავს.
ყვავილი თითოეულა ან ორ-ორი, ყვავილობა იცის გაჭიანურებული. მასიურად ყვავილობს მაისის მეორე ნახევრიდან ივნისის პირველ რიცხვებამდე.
ყვავილები საშუალო ზომისაა, ბუტკოს სვეტი მოკლეა და გვერდზე მოხრილია, მტვრიანობის რაოდენობა 20-25. გვირგვინი გარედან ვარდისფერია, მსხმოიარობა იცის უხვი და ადრეული. ნაყოფი მოგრძოა, საშუალო ზომის; სიმაღლე აქვს 5,5–7,2 სმ. დიამეტრი 5,4–5,8 სმ. წონა 150–165 გრ. ნაყოფი მოყვითალო ლიმონის ფერისაა და გლუვზედაპირიანი. წვერი წაწვეტებული ძუძუსთავისებრი აქვს, ფუძე მომრგვალოა.
ნაყოფის კანი ბორცვიანია, 0,3–0,4 სმ. სისქის. სირბილე წვრილმარცვლოვანია. ის 9-10 თანაბარი სეგმენტისაგან შედგება. აპკი თხელია, გემო მჟავე და კარგი არომატიანია (სიმჟავიანობა 7,5%).
წვენი იცის უხვი, გამჭვირვალე, მკრთალ-მოყვითალო ფერის, სასიამოვნო არომატიანი და მაღალი ხარისხის. თესლი ცოტა აქვს. ხშირად უთესლოა. ნაყოფი მწიფდება ნოემბრის მეორე ნახევარიდან დეკემბრის ნახევრამდე. მოსავლიანობა იცის უხვი – ინახება კარგად. ლიმონი ევრიკა ნაყოფს კრონის გარე ნაწილში, ყლორტების ბოლოებზე ისხამს.
