მავსოლეუმი
NPLG Wiki Dictionaries გვერდიდან
მავსოლეუმი (მავზოლეუმი) – საძვალე, რომელიც ძვ.წ. IV საუკუნეში ააგეს ჰალიკარნასოსში კარიის მეფე მავსოლოსისათვის.
ხუროთმოძღვარ პითეოსის მიერ შექმნილი ეს ნაგებობა ძველი სამყაროს ერთ-ერთ საოცრებად იყო მიჩნეული: იონიური ორდერის კოლონადით დამშვენებული კვადრატის ფორმის ცოკოლი პირამიდულ საფეხურებზე იყო აღმართული. შენობას აგვირგვინებდა კვადრიგა ეტლის ქანდაკება, რომელზეც მავსოლოსი და მისი მეუღლე იყვნენ აღზევებულნი. ფრიზის რელიეფებზე, ახლა რომ ბრიტანეთის მუზეუმში ინახება, მუშაობდნენ იმ დროის სახელოვანი მოქანდაკეები: სკოპასი, ლეოქარესი, ბრიაქსისი, ტიმოთეოსი. მოგვიანებით მონუმენტურ სამაროვნებს მავზოლეუმებს უწოდებდნენ.
