მაყვლიანი (ტაძარი)
მაყვლიანი - წარმართული ტაძარი, არქიტექტურული ძეგლი მდებარეობს ნაქალაქარ უფლისციხის უბანში. თარიღდება ელინისტური ხანით. გამოკვეთილია კლდეში. სამხრეთ კედლის ერთი ნაწილი უხეშად დაკუთხული ნატეხი ქვისაა. შემორჩენილი აქვს თავდაპირველი ნალესობის ფრაგმენტები. მაყვლიანი შედგება მთლიან ორგანიზმად გაერთიანებული ათი უჯრედისაგან (საერთო ფართობი 240 კვ.მ.) გამოირჩევა სირთულით და მაღალი ხუროთმოძღვრული ღირსებებით. შესასვლელი სამხრეთი კედლის დასავლეთ მონაკვეთშია. კარი საგანგებოდ არის აცდენილი დარბაზის სიმეტრიის ღერძიდან. გადის მოზრდილ მოედანზე, რომელიც თავდაპირველად გვერდზე (აღმოსავლეთით) მდებარე ამავე ტიპის, მაგრამ უფრო მცირე ტაძართან ყოფილა საზიარო.მაყვლიანის მთავარი ნაწილია მაღალ ბაქანზე აღმართული კამაროვანი პორტიკი. პორტიკს აღოსავლეთით, დასავლეთით და ჩრდილოეთით უერთდება ორ-ორი ოთახი. მათგან ჩრდილოეთით პირველი ოთახის ჭერი კვადრატული კესონებითაა მორთული. აღმოსავლეთი და დასავლეთი ოთხების ჩრდილოეთი კედლების სიღრმეში ორი სამალავი-სალაროა წრიული შესასვლელებით. პორტიკიდან 8-საფეხურიანი საზეიმო კიბე ჩადის ვრცელ თავგახსნილ გვირაბში, რომელსაც აღმოსავლეთით და დასავლეთით ორსაფეხურიანი ჩამოსაჯდომი (კულტის მსახურთათვის) გასდევს. სარიტუალო დანიშნულებისაა ტაძრის ახლოს, მოედნის კედლებში გამოკაფული მცირე სათავსებიც.
