მეკობრეობა
მეკობრეობა (ბერძნული peirates – მძარცველი, ყაჩაღი) – საერთაშორისო ხასიათის დანაშაული. გაეროს საზღვაო სამართლის შესახებ კონვენციის 1958 და ჟენევის ღია ზღვის შესახებ კონვენციის 1958 (იხ. ჟენევის კონვენცია საზღვაო სამართლის შესახებ 1958) თანახმად. მეკობრეობად ითვლება: კერძო მფლობელობაში მყოფი გემის ან საფრენი აპარატის ეკიპაჟის, ან მგზავრების მიერ პირადი მიზნებით ღია ზღვაში განხორციელებული ძალადობის, დაკავების ან გაძარცვის ნებისმიერი არასამართლებრივი აქტი, მიმართული სხვა გემის ან საფრენი აპარატის, ან მათ ბორტზე მყოფი პირების ან ქონების წინააღმდეგ; ასევე მსგავსი აქტი, მიმართული რომელიმე გემის ას საფრენი აპარატის, პირების ან ქონების წინააღმდეგ იმ ტერიტორიაზე, რომელიც არც ერთი სახელმწიფოს იურისდიქციაში არ შედის; რომელიმე გემის ან საფრენი აპარატის გამოიყენება ნებაყოფლობითი და შეგნებული მონაწილეობის ნებისმიერი აქტი ხსენებული არასამართლებრივი აქტების განხორციელების მიზნით: ნებისმიერი ქმედება, რომელიც წარმოადგენს ასეთი აქტების განხორციელებისათვის წაქეზებას ან შეგნებულ ხელშეწყობას, მეკობრეობად ითვლება იგივე ქმედება, განხორციელებული სამხედრო ხომალდების, სახელმწიფო გემების ან სახელმწიფო საფრენი აპარატების მიერ. საერთაშორისო სამართლის საყოველთაოდ აღიარებული პრინციპებისა და ნორმების შესაბამისად, მეკობრეთა გემები, საფრენი აპარატები და მათი ეკიპაჟი არ უნდა სარგებლობდეს რომელიმე ქვეყნის მფარველობით. ეკიპაჟის ეროვნული კუთვნილების და ალმის მიუხედავად. პირატთა გემი შეიძლება შეიპყროს სამხედრო ხომალდმა, საფრენმა აპარატმა, სხვა გემმა ან საფრენმა აპარატმა, რომელიც იმყოფება ნებისმიერი ქვეყნის სახელმწიფო სამსახურში და უფლებამოსილია ამ მოქმედებისათვის. დამკავებელი სახელმწიფოს სასამართლოს შეუძლია გამოიტანოს დადგენილება სასჯელის დადების შესახებ და განსაზღვროს, რა ზომები იქნეს მიღებული ამ გემების, საფრენი აპარატების ან მათ ბორტზე არსებული ქონების მიმართ.
