ჭუმბურიძე კობა

კობა ჭუმბურიძე

ჭუმბურიძე კობა – (1956), მხატვარი, პოეტი, მთარგმნელი. დაიბადა თბილისში. გამოცემული აქვს ლექსების კრებული „მეფეთა წიგნი“ (2011) და პოეტური თარგმანების კრებული – „ჩემ სამშობლო საქართველოა“ (2016).

დედა ენისა

წვიმებს, გერილებს და არაზანებს,

ჭალებს, ჭიჭრიკონად შეფერილებს

და ცის საფირონში განაზავებს,

ღრუბლებს, იალკიალ შეფენილებს,

ზვირთებს რიონის და ალაზანის,

ჭევლებს, ღარისთვალში ნაკულულებს,

გიზად მობიბინე ბააბანებს,

ტევრებს, მაღნარებს და დაბურულებს,

ქედებს, ხარირემთა საბალახოს,

ქარებს, ზეკარებს და საბარულებს,

მთათა მოქათქათე ჩაბალახებს,

ბარში ნაკადულად გაპარულებს,

კორდებს, ბოკერას და დალაუგას,

ცვარნამს, ბუსნარებში მოციალეს,

ბილიკს, ისარას და კაპიშუკას,

ბექებს, ბოლცომებს და ბორცვიანებს,

ბაღებს, თითოფერად აფეთქებულს,

რუებს, ღირღილებს და შფოთიანებს,

კორტოხს, სამზისგულედ წაფერდებულს,

ჭერეხს, კარკალებს და ლოდიანებს,

კაბო ცისარტყელას, ცხრაფერქებულს,

არმურს, ხევხუვებში ბოდიალას,

სერებს, კირჩხალებს და ქოჩქოჩელებს,

ჩხატებს, ბროლეულად ამტვერებულს

და ჩვენს დედა ენას, მოსაფერებს,

ერთად მოვეფეროთ ქართველებო!

წყარო

ქართველი პოეტები (ენციკლოპედია)