ბერლინის კონფერენცია 1945
ბერლინის კონფერენცია 1945 - (პოტსდამის კონფერენცია), მიმდინარეობდა 1945 წლის 17 ივლისიდან 2 აგვისტომდე, სსრ კავშირის, აშშ-ისა და დიდი ბრიტანეთის მთავრობების მეთაურთა კონფერენცია ცეცილიენჰოფის სასახლეში, პოტსდამში, ბერლინის ახლოს. საბჭოთა დელეგაციას ხელმძღვანელობდა სსრ კავშირის სახალხო კომისართა საბჭოს თავმჯომარე ი. სტალინი, აშშ-ის დელეგაციას – პრეზიდენტი ჰ. ტრუმენი, დიდი ბრიტანეთისას – პრემიერმინისტრი უ. ჩერჩილი (28 ივლისის შემდეგ კ.ეტლი). კონფერენციაზე მიიღეს გადაწყვეტილება გერმანიის დემილიტარიზაციის, დენაციფიკაციისა და დემოკრატიზაციის შესახებ. განიხილეს გერმანელთა მონოპოლიების მოსპობის, რეპარაციების (ზარალის გადახდა), პოლონეთის დასავლეთ საზღვრის საკითხები; ცნეს სსრ კავშირისათვის ქ. კენიგსბერგის გადაცემა აღმოსავლეთ პრუსიის ნაწილით.
წყარო
ქართული სამხედრო ენციკლოპედიური ლექსიკონი. აკადემიკოსის, გენერალ-მაიორ ელგუჯა მეძმარიაშვილის საერთო რედაქციით, - თბილისი, 2017.
