ჯუგაანი
ჯუგაანი – დიდი სოფელია საქართველოში, ქიზიყში, სიღნაღის მუნიციპალიტეტში, გომბორის ქედის ჩრდილო-აღმოსავლეთ კალთის ძირას. თემის ცენტრი. ზღვის დონიდან 400 მეტრი. სიღნაღიდან 12 კილომეტრი. იგი მდებარეობს წნორი-დედოფლისწყაროს გზატკეცილზე. პოეტ სანდრო შანშიაშვილის მშობლიური სოფელი.
ტოპონიმი ჯუგაანი წარმომდგარია ადამიანის საკუთარი სახელის (ჯუგა||ჯულა) მიხედვით, რომელსაც დართვია აქაური ტოპონიმიისათვის ერთობ ნიშანდობლივი -ან- სუფიქსი. ეს ფორმანტი საერთოდ ხშირად გვხვდება კახეთის, აგრეთვე, ქართლისა და მისი მთიანეთის ანთროპონიმული წარმოშობის ტოპონიმებში. მისი ფუნქციაა – აღნიშნოს ამა თუ იმ სოფელში მცხოვრები ძირითადი გვარის სიმრავლე, კრებითობა: ნან-იან-ი, ფან-იან-ი, ნუკრ-იან-ი, ოზა-ან-ი და სხვ. მრ.
ამის მიხედვით ჯუგა-ან-ი უნდა განიმარტოს, როგორც „ჯუგას შთამომავალთა სოფელი“, „სოფელი, რომლის პირველი და ძირითადი გვარი ჯუგაშვილი ყოფილა“. მოსალოდნელია, რომ ჯუგა მასზე უფრო გავრცელებული სახელის ჯუღას გადაბგერებული ვარიანტი იყოს. შემთხვევითი არ არის ის ფაქტი, რომ თელავის რაიონში არსებობს სოფელი ჯუღაანი. ამ ორი სახელწოდების ერთი და იმავე საკუთარი სახელისაგან წარმომავლობა ეჭვს არ იწვევს.
