ციალა კაჭარავა

ციალა კაჭარავა დაიბადა 1939 წლის 27 დეკემბერს, ჩხოროწყუში, ვარლამ კაჭარავას და ნადია ბახტაძის ოჯახში. 1957 წელს ოქროს მედალზე დაამთავრა ჩხოროწყუს საჯარო სკოლა და ჩაირიცხა საქართველოს სასოფლო-სამეურნეო ინსტიტუტის ახლადგახსნილ ტექნოლოგიურ ფაკულტეტზე. 1962 წელს წარჩინების დიპლომით დაასრულა მეღვინეობისა და ხილ-ბოსტნეულის ტექნოლოგიის კურსი და მიენიჭა ინჟინერ-ტექნოლოგის კვალიფიკაცია (ეს გახლდათ სასოფლო-სამეურნეო ინსტიტუტის მეღვინე ტექნოლოგების პირველი - 1962 წლის გამოშვება). იმავე წელს, „სამტრესტის“ (საქართველოს სსრ ღვინის მრეწველობის საკავშირო-რესპუბლიკური სახელმწიფო კომიტეტი) რეკომენდაციით, დაიწყო მუშაობა თბილისის ახალგახსნილ #3 ღვინის ქარხანაში - იგივე ს/გ „თბილღვინო“ (შემდგომში სააქციო საზოგადოება, ამჟამად, კომპანია „თბილღვინო“). ამ ქარხანაში იმსახურა მან უწყვეტად 50 წლის განმავლობაში, სხვადასხვა პოზიციებზე, „თბილღვინოს“ არსებობისა და საქმიანობის ყველა ეტაპზე (1962-დან 2012 წლის ჩათვლით). ციალა კაჭარავას გაცილება აღინიშნა(72 წლის ასაკში) კომპანიის სამახსოვრო სიგელით .