ისარლიშვილი ლუკა

ლუკა ისარლიშვილი

ისარლიშვილი ლუკა − (1814 − 1893), ქართველი პოეტი, პუბლიცისტი. იყო ნიკოლოზ ბარათაშვილის თანამედროვე, ისინი ერთ სკოლაში სწავლობდნენ და მან თავის თანასკოლელზე მოგონებაც დაგვიტოვა. ისარლიშვილი ლექსებს ბეჭდავდა „ცისკარში”, „ივერიაში”, 70-80-იან წლებში მსახურობდა ქართული ენის ცენზორად. 1894 წელს ზაქარია ჭიჭინაძემ მისი ლექსები ცალკე წიგნად გამოსცა.

ნიკოლოზ ბარათაშვილს

ნეტარ მას, ვინცა სიჭაბუკესა

სიყვარულისას შესწირავს ეშხსა

და ამა მსწრაფლსა ჩვენსა სიცოცხლეს, –

ტრფობისა ცეცხლით თავსა იხარებს

და გულსა ეშხით მარადის იგზნებს;

ვინცაღა ტკბილად სიყვარულისა,

ამა საწუთროს ნეტარებისა

ფიალა შესვა სიჭაბუკესა!..

ვინცა გამოვლის მაცთურსა სოფელს,

და სიყვარულის ტანჯვას და სევდას,

ოხვრითა ხსოვნა თან არ დაჰყვება –

და დროს წარსულსა, მარად გამქრალსა

ოდენ სიამით მოიგონებსა!..

წყარო

ქართველი პოეტები (ენციკლოპედია)