ხერგიანი მირონ

მირონ ხერგიანი

ხერგიანი მირონ – (1943), ქართველი მწერალი, პოეტი, პუბლიცისტი, მთარგმნელი. მისი პირველი ლექსები 1962 წელს გამოქვეყნდა თსუ-ს გაზეთ „თბილისის უნივერსიტეტში“, პირველი მოთხრობა „თეთრი მწვერვალი“ კი – 1963 წელს ჟურნალ „პიონერში“. მას შემდეგ მისი ნაწარმოებები – რომანები, მოთხრობები, ლექსები, პუბლიცისტური სტატიები, მხატვრული ნარკვევები და თარგმანები პერიოდულად ქვეყნდება ჩვენს სალიტერატურო პერიოდიკაში, გამოდის ცალკე წიგნებად.

* * *

ეს რა სევდის ცა არი, ეს ცა სევდის ცა არი,

არა - ჩვენი ბავშვობის... ყველაფერი უეცრად

და თვალდათვალ დაგვშორდა.

მეზმანება ვან-გოგი, სევდის ბორინაჟებში...

რუსთაველზე ტოლებთან ეშხით მოინაზები...

ეჰ, რა იყო ოდესღაც ორივენი ვბავშვობდით...

მერმე ფიქრნი განილტვნენ,

უმძრახებად დაშორდნენ...

მეზმანება ვან-გოგი, სევდის ბორინაჟებში...

რუსთაველზე ტოლებთან ეშხით მოინაზები...

ეშხით მოინაზები, რწევით ალვა-ტანისა,

ვარსკვლავთა ალმასები, ნაზად კრთომა მთვარისა,

შენზე ფიქრმა იშორა, შენზე ფიქრმა დანისლა...

ეს ცა სევდის ცა არი, არა - ჩვენი ბავშვობის...

ყველაფერი უეცრად და თვალდათვალ დაგვშორდა!

წყარო

ქართველი პოეტები (ენციკლოპედია)