ქობულაძე სერგო
სერგო ქობულაძე − ქართველი მხატვარი, საქართველოს სამხატვრო აკადემიის პროფესორი, შემდგომ ― რექტორი (1952-1959), სსრ კავშირის სამხატვრო აკადემიის წევრ-კორესპონდენტი, არაერთი ორდენისა და მედლის კავალერი, სსრ კავშირის სახელმწიფო პრემიის ლაურეატი, შოთა რუსთაველის სახელობის სახელმწიფო პრემიის ლაურეატი (1979, სიკვდილის შემდეგ).
დაიბადა ახალციხეში 1909 წელს, შევიდა თბილისის სამხატვრო აკადემიაში 1925 წელს; მისი მასწავლებლები იყვნენ: გიგო გაბაშვილი, ევგენი ლანსერე და იოსებ შარლემანი, 30-იანი წლებიდან მონაწილეობდა გამოფენებში, მისი ნამუშევრები წარდგენილი იყო ლონდონისა და ვენეციის გამოფენებზე, 1930-1932 წლებში სერგო ქობულაძე მოსკოვსა და ლენინგრადში გატაცებით ეცნობა გამოჩენილი ოსტატების ნამუშევრებს.
დაზგური გრაფიკისა და წიგნის გრაფიკის გამოჩენილ ოსტატს, სერგო ქობულაძეს განსაკუთრებული ადგილი უჭირავს მეოცე საუკუნის ქართულ სახვით ხელოვნებაში; 1935-1937 წლებში შესრულებულმა „ვეფხისტყაოსნის“ ილუსტრაციებმა მხატვარს როგორც საქართველოში, ისე მთელ საბჭოთა კავშირში ნახატის ერთ-ერთი პირველხარისხოვანი ოსტატის სახელი დაუმკვიდრა; ეს ნამუშევარი მოსკოვის ტრეტიაკოვის გალერეის ექსპოზიციაში შევიდა და მრავალჯერ გამოიცა.
გარდა „ვეფხისტყაოსნის“ ხსენებული ილუსტრაციებისა, სერგო ქობულაძის მთავარ შემოქმედებით მიღწევებად შეიძლება ჩაითვალოს, აგრეთვე, მაღალმხატვრული ილუსტრაციები რუსული ეპოსისათვის „ამბავი იგორის ლაშქრობისა“ (1939-1940), შექსპირის ტრაგედიისათვის „მეფე ლირი“ (1946), შალვა დადიანის რომანისათვის „იური ბოგოლუბსკი“ (1960), პუშკინის წიგნისათვის (1952), ქართული ხალხური ზღაპრების კრებულისათვის (1951-1953), აგრეთვე, ხელოვნების შესანიშნავი ნიმუში, თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრის ფარდა (1961), აგრეთვე დაზგური გრაფიკის არაერთი შესანიშნავი ნამუშევარი.
ცალკე აღნიშვნის ღირსია მხატვრის დღემდე გამოუქვეყნებელი თეორიული ხასიათის შრომები ქართული ხუროთმოძღვრების გენეზისის საკითხებზე.
1979 წელს (სიკვდილის შემდეგ) უკანასკნელ წლებში შექმნილი ნაწარმოებებისათვის (დანტეს, რუსთაველის და სხვათა პორტრეტები) სერგო ქობულაძეს შოთა რუსთაველის სახელობის სახელმწიფო პრემია მიენიჭა.
სერგო ქობულაძე გარდაიცვალა 1978 წელს, დაკრძალულია მწერალთა და საზოგადო მოღვაწეთა დიდუბის პანთეონში.
„ნესტან-დარეჯანის ქაჯთაგან შეპყრობა“, „ვეფხისტყაოსნის“ ილუსტრაცია, გუაში
ავთანდილი, „ვეფხისტყაოსნის“ ილუსტრაცია, გუაში
ტარიელი, „ვეფხისტყაოსნის“ ილუსტრაცია, გუაში
სერგო ქობულაძის ფარდის ესკიზის ასლი
დანტე ალიგიერი, გრაფიკა, ფანქარი
ქ„ალი სარკით,“ გრაფიკა, ფანქარი, ტუში
