იხილეთ წყარო გვერდისთვის ქოჩორა წიწკანა

'''ქოჩორა წიწკანა''' (ლათ. Parus cristatus Linnaeus, 1758) – ფრინველი [[ბეღურასნაირნი|ბეღურასნაირთა]] რიგიდან.
* კლასი − ფრინველები (AVES)
* რიგი − [[ბეღურასნაირნი]] (Passeriformes)
* ოჯახი − [[წივწივასებრნი]] (Paridae)
* გვარი − [[წივწივა]] (Parus)
ქოჩორა წიწკანა პატარა ზომის ფრინველია, ფრთა 60-70 მმ-ია, კუდი – 50-55 მმ, [[ნისკარტი (ფრინველის)|ნისკარტი]] 7-10 მმ, წონა – 10-15 გ. სქესობრივი დიმორფიზმი სიდიდესა და შეფერილობაში მცირედაა გამოხატული. ზრდასრულ მამალს თავზე მუქი წაგრძელებული ბუმბულების ქოჩორი აქვს, რომელთა წვეროები [[თეთრი (ფერი)|თეთრია]]. თავის გვერდები მოთეთროა, მაგრამ ვიწრო შავი ზოლები, რომლებიც ნისკარტის ძირში იწყებიან, გაივლიან თვალების გასწვრივ, შემოუვლიან ყურების მფარავებს და კისრის გვერდებზე გამოყოფენ თეთრ ფართო ზოლებს. სხეულის დანარჩენი ზემო მხარე მოწენგოსფრო-მურაა, უფრო მუქი ფრთებზე და მოქარცისფრო კუდზედა მფარავებზე. სხეულის მუცლის მხარე ჭუჭყიანი თეთრია; ყელზე სამკუთხა ლაქაა; სხეულის გვერდებსა და კუდქვეშა ბუმბულებზე გადაჰკრავს მოყავისფრო ელფერი. დედალს ქოჩორი ოდნავ მოკლე აქვს; ქოჩორზე, აგრეთვე ყელზე, შავი ფერის მაგივრად მურა გადაჰკრავს. ნისკარტი თითქმის შავია, ფეხები – [[რუხი (ფერი)|რუხი]].

აღწერილია 5 ქვესახეობა. [[საქართველო]]ში მოიპოვება ჩვეულებრივი ქოჩორა წიწკანა – P. c. cristatus Linn., 1758.

====გავრცელება==== 
სახეობის არეალი მოიცავს [[ევროპა|ევროპის]] უმეტეს ნაწილს: დასავლეთით [[ატლანტის ოკეანე|ატლანტის ოკეანის]] სანაპიროებიდან, აღმოსავლეთით ცენტრალურ ურალამდე. [[დიდი ბრიტანეთი|ბრიტანეთში]] არის მხოლოდ მის ჩრდილოეთ ნაწილში. სკანდინავიასა და [[ფინეთი|ფინეთში]] აღწევს 65-ე პარალელამდე, სსრ კავშირში ონეგის ტბამდე, შემდეგ სიკტივკარამდე, პერმის ოლქის სამხრეთ ნაწილსა და სვერდლოვსკამდე; სამხრეთით – ხმელთაშუა ზღვის სანაპიროებით ალბანეთსა და [[ბულგარეთი|ბულგარეთში]], კარპატებში, [[უკრაინა|უკრაინის]] ტყე-ველებზე და კუიბიშევის ოლქში, სვერდლოვსკამდე. შემოდგომითა და ზამთარში, როცა მომთაბარეობს, მნიშვნელოვნად სცილდება ბუდობის არეალს. საქართველოში მოიპოვება ზოგჯერ მომთაბარეობის დროს.

====ბიოტოპი==== 
ბინადრობს წიწვიან ტყეებში, მეტწილად ნაძვნარებში, ზოგჯერ შეიძლება შეგვხვდეს შერეულ ტყეშიც, მაგრამ მხოლოდ წიწვიან [[ხე]]ებზე.

====გამრავლება==== 
ბუდობს ფუღუროებში, ზოგჯერ – ციყვის ძველ ბუნაგში ან მტაცებელ ფრინველთა ბუდის ქვედა ნაწილში. ბუდის ძირითად ნაწილს აგებს [[ხავსი]]სა და მღიერებისაგან, ხოლო შიგნითა ნაწილს – მატყლისაგან. ბუდის აგებაში მონაწილეობს ორივე სქესის ფრინველი. წელიწადში მრავლდება ორჯერ. პირველი ბუდობის დროს – აპრილის მეორე ნახევარში, დებს 7-10 კვერცხს. მეორე ბუდობა მიმდინარეობს ივნისში. ამ დროს კვერცხების რაოდენობა მხოლოდ 6-7-ია. კრუხად ჯდება მხოლოდ დედალი, ხოლო მამალი კვებავს მას. საინკუბაციო პერიოდი 15-17 დღემდე გრძელდება.

====კვება==== 
ქოჩორა წივწივას ძირითადი საკვებია წიწვიანი ხეების კრონაში მცხოვრები [[მწერები]] და ობობები. ზოგჯერ ჭამს წიწვიანთა თესლებსაც. 

====მნიშვნელობა==== 
მავნე მწერების მასობრივად განადგურებით მნიშვნელოვანი სარგებლობა მოაქვს სატყეო მეურნეობისათვის.

==წყარო==
[[საქართველოს ფრინველების სარკვევი]]
[[კატეგორია:ფრინველები]]
[[კატეგორია:ბეღურასნაირნი]]
[[კატეგორია:წივწივასებრნი]]
[[კატეგორია:წივწივა]]