ვაგნერის ჯილდო (ვაშლის ჯიში)

13:55, 24 ნოემბერი 2016-ის ვერსია

ვაგნერის ჯილდო

ვაგნერის ჯილდო – Wagner price apple, Wagner Preis, Wagner Appel. ვაშლის ჯიში.

ვაგნერის ჯილდო წარმოშობით ჩრდილო–ამერიკის შტატებიდანაა. ჩვენში ვაგნერის ჯილდოს ძველი ხეები ბევრი არ გვხვდება. ახალ ნარგავებში იგი მხოლოდ ზოგიერთ რაიონშია გაშენებული.

ნაყოფი საშუალო ზომისაა, მობრტყო–მომრგვალო, აშკარად წახნაგოვანი, მტკიცედ ზის სანაყოფე ტოტზე და ქარისაგან ადვილად არ სცვივა. ვაგნერის ჯილდო უხვად ინასკვება და უხვი მოსავლის დროს ძლიერ იწვრილებს ნაყოფს, რის გამოც მისი დანორმება (გამოთხელება) ძლიერ კარგ შედეგს იძლევა.

ნაყოფის ჯამი დახურულია და ზის განიერ, არაღრმა ბორცვიან ღრუში.

ვაგნერის ჯილდოს ყვავილი

ნაყოფის ყუნწი გრძელია, წვრილი, ზის ღრმა და განიერ ღრუში, რომელიც ჟანგაროს ხალებითაა მოფენილი.

ნაყოფის კანი თხელია, გლუვი, ოდნავ ცხიმოვანი, აქვს მომწვანო–მოყვითალო ძირითადი შეფერვა. სრული სიმწიფისას კი ლიმონისებრ–ყვითელ ელფერს ღებულობს და დიდი წითელი საფარი ფერი ნაყოფს თითქმის მთლიანად ფარავს: ზოგ ადგილში მოჩანს ყვითელი ხალები.

ნაყოფის ხორცი მოყვითალო–მოთეთროა, მკვრივი; სრული სიმწიფისას ოდნავ რბილდება და მოტკბო–მომჟაო გემოსი ხდებგა. მოხმარებითი სიმწიფე უდგება ნოემბერ–დეკემბერში; საწყობში ნაყოფი სძლებს გაზაფხულამდე ისე, რომ არც ჭკნება და არც ლპება.

ხე მეტად ყინვაგამძლეა, მცირე ზრდისაა, არ ვითარდება ძლიერ ხეებად, მხოლოდ კარგი ჰავისა და ნიადაგის პირობებში ვითარდება საშუალო ტანის ხედ. ინვითარებს განიერ პირამიდულ ვარჯს. გარემო პირობების მიმართ მეტად ნაკლები მოთხოვნილებისაა, ადრე იწყებს მოსავლის მოცემას, უხვი მოსავალი თითქმის ყოველწლიურად იცის, იძლევა დიდ სასაქონლო გამოსავალს და მეტად მცირე დანაკარგებს, როგორც ბაღში, ისე საწყობშიაც. ვაგნერის ჯილდო როგორც მეორეხარისხოვანი უხვი მოსავლის მომცემი, კარგ საოჯახო ჯიშად უნდა იქნეს ცნობილი და საქართველოს პირობებში მისი ფართოდ გაშენება სასურველია.

წყარო

საქართველოს კულტურული ფლორის ატლასი = Атлас культурной флоры Грузии = Atlas for the cultivated Flora of Georgia / ნ. ხომეზურიშვილი და ელ. ერისთავი ; საქართველოს სსრ მიწსახკომი. ლ.პ. ბერიას სახელ. სას.-სამ. ინსტიტუტი. - თბილისი : ტექნიკა და შრომა, 1939-1951. - 30 სმ[MFN: 51572] თემატიკა: - საქართველოს კულტურული ფლორის ატლასები; ტ. 2 : საქართველოს სამრეწველო ხილის ჯიშები = Промышленные сорта плодов Грузии = Varietes of commercial Georgian Fruits. - 1941. - 217, LIV გვ. : ილ., 71 ჩართ. ფურც. ფერ. ილ.. - დამატებითი თავფურცელი რუსულ, ინგლისურ ენებზე. - ტექსტი ქართულ, რუსულ, ინგლისურ ენებზე. - 73მ., ყდა 7მ., 2500ც.[MFN: 52879] UDC: 634.1/7:631.526.32 თემატიკა: - ხილის ჯიშები საქართველოში;