ბულგარეთი

11:10, 27 ოქტომბერი 2017-ის ვერსია

ბულგარეთი - (Republic of Bulgaria - ბულგარეთის რესპუბლიკა), სახელმწიფო სამხრეთაღმოსავლეთ ევროპაში, ბალკანეთის ნახევარკუნძულის აღმოსავლეთ ნაწილში. აღმოსავლეთით აკრავს შავი ზღვა. ჩრდილოეთით ესაზღვრება რუმინეთი, დასავლეთით - სერბეთი, მაკედონია, სამხრეთით - საბერძნეთი, სამხრეთ- აღმოსავლეთით - თურქეთი. ფართობი 110,9 ათ. კმ². მოსახლეობა 7,4 მლნ. კაცი (2012), 85% ბულგარელები. ოფიციალური ენა - ბულგარული, დედაქალაქი - ქ. სოფია. ადმინისტრაციულად იყოფა 9 მხარედ. ბულგარეთი საპარლამენტო რესპუბლიკაა, სახელმწიფოს მეთაური - პრეზიდენტი. ქვეყნის საკანონმდებლო ორგანო - სახალხო კრება (ერთპალატიანი პარლამენტი), აღმასრულებელი - მინისტრთა საბჭო (მთავრობა). თანამედროვე ბულგარეთი დამოუკიდებელი სახელმწიფოა 1908 წლიდან. იგი ნატოს წევრი ქვეყანაა. ბულგარეთში განვითარებულია ინდუსტრიულ-აგრარული მეურნეობა, ტურიზმი, შავი ზღვის კურორტები საერთაშორისო მნიშვნელობისაა. მთავარი პორტები - ბურგასი, ვარნა. მთავარი საერთაშორისო აეროპორტი - სოფია. შეიარაღებული ძალები საერთო შემადგენლობით 26,5 ათ. კაცი (2012), სახმელეთო ჯარები 16,3 ათ., სამხედროსაჰაერო 6,7 ათ. და სამხედრო-საზღვაო 3,5 ათ. დაკომპლექტება ხორციელდება გაწვევით.

წყარო

ქართული სამხედრო ენციკლოპედიური ლექსიკონი. აკადემიკოსის, გენერალ-მაიორ ელგუჯა მეძმარიაშვილის საერთო რედაქციით, - თბილისი, 2017.