ბაქრაძე იოსებ

მიმდინარე ცვლილება 16:19, 21 თებერვალი 2022 მდგომარეობით

ბაქრაძე იოსებ − (1850 − 1987), ქართველი პოეტი და მთრგმნელი. დაიბადა სოფელ არბოში (გორი). პირველდაწყებითი განათლება გორის სასულიერო სასწავლებელში მიიღო, რომლის დამთავრების შემდეგ სწავლა გააგრძელა თბილისის სასულიერო სემინარიაში. 1870 წლებიდან იოსებ ბაქრაძე სისტემატურად აქვეყნებდა ლექსებს, თარგმანებსა და წერილებს ქართულ პრესაში: „დროებაში”, „ივერიაში”, „მოამბეში”, „მნათობსა” და „კვალში”. მის კალამს ეკუთვნის ჰაინეს ლექსების თარგმანიც. სწორედ მისი თარგმნილია ჰაინეს ლექსი „ახ ტურფავ, ტურფავ”, რომელსაც დღესაც მღერიან და ბევრს ქართული ლექსი ჰგონია. დაკრძალულია პეტრე-პავლეს სასაფლაოზე.

ჰაინრიხ ჰაინე

თარგმნა იოსებ ბაქრაძემ

ტურფავ, ტურფავ! რას უყურებ,

მოაცურე ჩემსკენ ნავი,

ერთად დავსხდეთ და ვუყუროთ,

როგორ არხევს ნავს ნიავი.

ნურას ჰფიქრობ ჩემზედ ავსა,

გულს მხურვალედ ჩამეკარი,

თუ რომ შენს თავს ანდობ ზღვასა,

მე რათღა ვარ უნდობარი.

მაგრამ გულიც ხომ ზღვა არის,

ხან ჰღელავს და ხან მშვიდდება.

და ძვირფასი მარგალიტი

იმაშიაც იმალება...

[რედაქტირება] წყარო

ქართველი პოეტები (ენციკლოპედია)