სოფელი მირიანი

01:43, 6 აპრილი 2024-ის ვერსია

მირიანი – სოფელი აღმოსავლეთ საქართველოში, ცენტრალურ ქართლში, კასპის მუნიციპალიტეტში, კავთისხევის თემში. მდებარეობს მდინარე მტკვრის მარცხენა მხარეს. ზღვის დონიდან 500 მეტრზე, კასპიდან დაშორებულია 15 კმ.

ადგილობრივი მოსახლეობა მშობლიური სოფლის წარმოშობას ქართველთა ლეგენდარული მეფის მირიანის სახელს უკავშირებს: საზაფხულო დასასვენებელი ადგილი მირიან მეფეს აქ, ამ სოფელში ჰქონიაო (ციური ივანეს ასული ილურიძე). თუ გავითვალისწინებთ იმ ფაქტს რომ მირიანი თავდაპირველად ერქვა (და ახლაც ჰქვია) მტკვრისპირას მდებარე ვრცელ სახნავ-სათეს მიწებს (თხოთის ქედის სამხრეთი კალთები), მაშინ ძალაუნებურად გაგვიჩნდება ვარაუდი იმის თაობაზე, რომ მირიანი ეს იგივე მერიანი (მერე – „მდინარისპირა ვაკე ადგილები“) უნდა იყოს; (სათესი ადგილის სახელად გვხვდება ზემო აჭარაში, მეორე მხრივ გამორიცხული არ უნდა იყოს მირიანის ანთროპონიმული წარმოშობა („მირიაშვილების სოფელი“). ამიტომაც სარწმუნოდ ვეღარ გამოიყურება ტოპონიმ მირიანის მითრას (მიჰრა) საკულტო სახელთან დაკავშირების ვერსია, რომლის მიხედვითაც მირიანის მიერ წმინდა ჯვრის აღმართვამდე და ეკლესიის აგებამდე მითრას წარმართული სალოცავი შეიძლება სწორედ აქ, თხოთის მთის შემოგარენში, ყოფილიყო.

ტოპონიმი მირიანი არ არის იმ ხნოვანებისა, რომ მისი წარმოშობის ისტორია წარმართულ ეპოქაში, კერძოდ, მითრას კულტმსახურებასთან კავშირში ვეძიოთ.

წყარო

ქართულ ტოპონიმთა განმარტებით-ეტიმოლოგიური ლექსიკონი