ნარეკვავი

17:16, 20 აპრილი 2024-ის ვერსია

ნარეკვავი სოფ. მჭადიჯვარში

ნარეკვავი – პატარა მდინარე მცხეთა-მთიანეთის მხარეში. დუშეთისა და მცხეთის მუნიციპალიტეტებში. სათავე აქვს ალევის ქედის სამხრეთ ბოლოზე, ზღვის დონიდან 1360 მ-ზე, ერთვის მდინარე არაგვს მარჯვნიდან. სიგრძე 47 კმ, აუზის ფართობი 277 კმ².

საზრდოობს წვიმის, თოვლისა და მიწისქვეშა წყლით. წყალდიდობა იცის გაზაფხულზე, წყალმცირობა — წლის დანარჩენ დროს, წყალმოვარდნა — შემოდგომაზე.

მდინარის სახელწოდების ეტიმოლოგია უცნობია. ფორმის თვალსაზრისით იგი მიმღეობურ სახელს მოგვაგონებს, ნა-ავ აფიქსით გაფორმებულს, მაგრამ რას უნდა უკავშირდებოდეს თვითონ -რეკვ-ძირი, ძნელი სათქმელია. XVII საუკ. ერთ-ერთ დოკუმენტში ნარეკვავი ნარეკვა ფორმით არის მოხსენიებული, მაგრამ ეს ფაქტიც არაფერს გვეუბნება სახელწოდების წარმოშობის თაობაზე. უთუოდ საინტერესოა ისიც, რომ კ. ჰანს ჰიდრონიმი ნარეკვავი შეცდომით აქვს ჩაწერილი და განმარტებული: колючая трава „ნარი“ ворона „ყვავი“. სიტყვათა ამგვარ კავშირს თვით ჰანიც გაუოცებია: კაცმა არ იცის, საიდან მომდინარეობს ასეთი უცნაური სახელწოდებაო. იქნებ: ნარეგვავი „სწრაფი დინებისაგან გარეგვილი ადგილები?“.

წყარო

ქართულ ტოპონიმთა განმარტებით-ეტიმოლოგიური ლექსიკონი