დირიჟაბლი

13:29, 5 დეკემბერი 2017-ის ვერსია

დირიჟაბლი - (ფრანგული dirigeable - მართვადი), ჰაერზე მსუბუქი მართვადი საფრენი აპარატი. ძირითადი ნაწილებია: აირით (ჩვეულებრივი წყალბადით ან ჰელიუმით) გავსებული კორპუსი, კორპუსის ბოლოში ჯვარედინად განლაგებული ჰორიზონტალური და ვერტიკალური უძრავი სიბრტყეები (სტაბილიზატორი და კილი), სიმაღლის და მიმართულების საჭეები, აგრეთვე ერთი ან რამდენიმე გონდოლა ეკიპაჟის, მგზავრების, ძრავების და მოწყობილობების მოსათავსებლად.

არსებობს რამდენიმე სახეობის დირიჟაბლი: რბილი სისტემის, ნახევრად ხისტი და ხისტი სისტემის.

I მსოფლიო ომის დროს დირიჟაბლს იყენებდნენ დაბომბვისა და დაზვერვისათვის, ხოლო II მსოფლიო ომის დროს ნაღმების და ჩაძირული გემების ძიებისთვის, ტვირთის ტრანსპორტირებისათვის და მედესანტეების სავარჯიშოდ. თანამედროვე დირიჟაბლს იყენებენ ძირითადად სატვირთო და სამგზავრო გადაზიდვებისათვის, სახანძრო დაცვისა და სამეცნიერო მიზნებისათვის. სამხედრო მიზნებისთვის მისი გამოყენება შეზღუდულია.

წყარო

ქართული სამხედრო ენციკლოპედიური ლექსიკონი. აკადემიკოსის, გენერალ-მაიორ ელგუჯა მეძმარიაშვილის საერთო რედაქციით. თბილისი, 2017