ბაბეზიოზი

ბაბეზიოზი - (babesiosis; აღმძვრელის გვარის დასახელება babesia + ბერძნ. osis დაავადება) – ცხოველთა ობლიგატურ-ტრანსმისიული დაავადება, გამოწვეული Babesia-ს გვარის უმარტივესებით. ძროხეულის ბაბეზიოზის აღმძვრელია Babesia bovis.მისი გადამტანია Ixodes-ის გვარის ტკიპი. დაავადება ვლინდება აპრილ-ივნისში, ნაკლებად – შემოდგომის თვეებში.

სიმპტომები: მაღალი ტემპერატურა, ლორწოვანი გარსების ანემია, სიყვითლე, ჰემოგლობინურია, საჭმლის მომნელებელი ტრაქტისა და გულსისხლძარღვთა ფუნქციის მოშლა. ცხვრის ბაბეზიოზის აღმძვრელია B.ovis. გავრცელებულია კავკასიაში, შუა აზიის რესპუბლიკებში. მისი გადამტანია Rhipicephalus-ის გვარის ტკიპი. დაავადება ხშირად, სხვა ჰემოსპორიდიოზულ დაავადებებთან ერთად, უპირატესად შემოდგომაზე ვლინდება ისეთივე კლინიკური ნიშნებით, როგორიც დამახასიათებელია ძროხეულის ბაბეზიოზისთვის.

წყარო

სავეტერინარო პარაზიტოლოგიის ტერმინთა ლექსიკონი