ბარდიტები

ბარდიტები – (გერმ. bardit – საომარი სიმღერა), გერმანული ნაციონალურ-პატრიოტული დრამები. მე-18 საუკუნის მე-2 ნახევარში შექმნა ფ. კლოპშტოკმა: „გერმანის ბრძოლა“, „გერმანი და თავადები“, „გერმანის სიკვდილი“. დაწერილია პროზით, შიგ ჩართული ლექსებით. მასში განდიდებულია ძველგერმანელი მხედართმთავარი არმინიუსი (გერმანი), რომელიც იბრძოდა თვითმპყრობელური რომის წინააღმდეგ. ბარდიტების მიმართ აღტაცება გამოხატეს „შეტევისა და ქარიშხლის“ მწერლებმა. არასცენურობის გამო ბარდიტები არ დადგმულა. ბარდიტებში აღძრული თემატიკა შემდგომში გადაამუშავეს ჰ. კლაისტმა, ქ. გრაბემ, რ. ვაგნერმა.

წყარო

მსოფლიო თეატრის ენციკლოპედიური ლექსიკონი