დინგელშტედტი ფრანც ფონ
ფრანც ფონ დინგელშტედტი – (1814-1881), გერმანელი მწერალი, დრამატურგი, რეჟისორი, თეატრალური მოღვაწე.
1846 წ. მუშაობა დაიწყო შტუტგარტის სასახლისკარის თეატრში, დაწერა პიესა „ბარნევალდტის სახლი“. 1851 წლიდან ხელმძღვანელობდა სასახლისკარის თეატრს მიუნხენში, სადაც დადგა სპექტაკლები გოეთეს, შილერის, ლესინგის (და სხვ.) პიესების მიხედვით. ამ სპექტაკლებში მონაწილეობდნენ იმ დროის გამოჩენილი გერმანელი მსახიობები. 1857 წ. სათავეში ჩაუდგა ვაიმარის სასახლისკარის თეატრს, სადაც დადგა შექსპირის პიესები. 1867 წ იგი გახდა ოპერის თეატრის დირექტორი, 1870 წლიდან სიცოცხლის ბოლომდე იმუშავა დირექტორად ვენის „ბურგთეატრში“, სადაც დადგა გოეთეს, კლაისტის, გრილპარცერის პიესები. მის მოღვაწეობას დიდი მნიშვნელობა ჰქონდა მე-19 საუკუნის გერმანული და ავსტრიული თეატრისათვის. იგი ითვლება მეინინგელების წინამორბედად.
