ქვაპურა
ქვაპურა – (Bupleurum wittmannii Steven.); ოჯახი: ქოლგოსნები (Apiaceae). ერთწლიანი ბალახოვანი მცენარეა, სიმაღლით 20-60 სმ. შუა ნაწილიდან ან ძირიდანვე დატოტვილი. ღეროსეული ფოთლები მალე ჭკნება. ღეროსეული ქვედა ფოთლები გულისებური ფუძითაა, წაწვეტებული ან მობლაგვო. შუა და ზედა ფოთლები გახვრეტილია მომრგვალო კვერცხისებურად ან მომრგვალოდ, ყვავილედი 7-12-სხივიანი ქოლგაა, საბურველაკის ფოთოლაკები ყვითელია, თანაბარი ზომისა და ქოლგაკებს ოდნავ აღემატება. ყვ. ნაყ. V-VI. მშრალი ჰაბიტატების მცენარეა. იზრდება ღია, მშრალ ფერდობებზე. კახეთში მისი ნახვა შესაძლებელია გარეჯის მიდამოებში. საქართველოში გვხვდება შიდა და ქვემო ქართლში, არის ჯავახეთშიც.
წყარო
კახეთის რეგიონის მცენარეები – 400 სახეობის მცენარე და 402 ფოტო; სარკვევზე იმუშავა კახაბერ სუხიტაშვილმა; რედაქტორი მაია ახალკაცი, თბილისი 2016.
