ტყის ფურისულა
NPLG Wiki Dictionaries გვერდიდან
ტყის ფურისულა - (Primula woronowii Losinsk.); ოჯახი: ფურისულისებრნი (Primulaceae). მრავალწლიანი ბალახოვანი მცენარეა. ფოთლები ოდნავ ნაოჭიანია, მოგრძო-უკუკვერცხისებურია, კიდეებზე კბილებიანი, კბილების დაბოლოებები ოდნავ ეკლიანია, ყუნწი – ოდნავ ფრთიანი. ორივე მხარე შებუსულია. ყვავილის ყუნწები ფოთლებზე გრძელი ან მისი ტოლია. გვირგვინი შეფერილობით იასამნისფერიდან თეთრამდეა, ხახაში პატარა ყვითელი ლაქით. ყვ. ნაყ. II-IV. მცენარე გავრცელებულია დაბლობიდან სუბალპურ სარტყლამდე, ტყეებსა და ხევებში. კახეთში მისი ნახვა შესაძლებელია ყველგან. ცნობილია თითქმის მთელ საქართველოში.
წყარო
კახეთის რეგიონის მცენარეები – 400 სახეობის მცენარე და 402 ფოტო; სარკვევზე იმუშავა კახაბერ სუხიტაშვილმა; რედაქტორი მაია ახალკაცი, თბილისი 2016.
