ოქრო ლეღვა
ოქრო ლეღვა - ზემო კახეთის ლეღვის ჯიშია, რომელიც გვხვდება აგრეთვე შუა კახეთის სოფლებში და ზოგჯერ ალაზნის გაღმაც. ხე იზრდება ძლიერ დიდი, მომეტებულად შტამბიანი, ხშირი ტოტებით.
ფოთოლი შედარებით წვრილი აქვს, ნაკლებად დანაკვთული, სამთათა და არა ღრმა ნაკვთებით.
ფოთლის სიფრიფანა ძლიერ სუსტადაა დაძარღვული, ბაცი მკრთალი მწვანე ფერისაა.
ოქრო ლეღვა იძლევა მხოლოდ ზაფხულის ნაყოფს უკაპრიფიგაციოდ.
ნაყოფი აქვს საშუალო სიდიდის, მომრგვალო ფორმის, ყუნწი მოკლეა, დაბალი, მწვანე ფერის. ნაყოფის კანი მოწითალო-ოქროს ფერისაა; აქედან წარმოსდგა მისი ჯიშური სახელწოდებაც. ნაყოფის გული გამოვსებულია ნაყოფის ხორცით და თესლით, რომლის რაოდენობა დიდი არ არის. თესლს ახასიათებს უკეთესი აღმოცენების უნარი ვიდრე სხვა, ჩვეულებრივი ლეღვის, არა კაპრიკატორ ჯიშებს.
ნაყოფის ხარისხი მაინცდამაინც დიდად არ დაფასდება, მაგრამ როგორც ადგილობრივი მოხმარების სუფრის ჯიში, მისაღებია.
ჯიშის დამახასიათებელია: უხვი მოსავალი, ხანგრძლივი სიმწიფის პერიოდი და ძლიერ ნაკლები მოთხოვნილება ჰავის მიმართ, თუმცა ძლიერ ტენიან ჰავის პირობებში, ნაყოფი მჟავდება ხეზევე.
ოქრო ლეღვა მომავალში დაიკავებს სათანადო ადგილს, როგორც უხვმოსავლიანი ჯიში, რომლის ნაყოფი გადამუშავებისათვის, ყავის სუროგატების დასამზადებლად, ან სპირტის გამოსახდელად მისაღები იქნება.
წყარო
საქართველოს კულტურული ფლორის ატლასი = Атлас культурной флоры Грузии = Atlas for the cultivated Flora of Georgia / ნ. ხომეზურიშვილი და ელ. ერისთავი ; საქართველოს სსრ მიწსახკომი. ლ.პ. ბერიას სახელ. სას.-სამ. ინსტიტუტი. - თბილისი : ტექნიკა და შრომა, 1939-1951. - 30 სმ[MFN: 51572] თემატიკა: - საქართველოს კულტურული ფლორის ატლასები; ტ. 2 : საქართველოს სამრეწველო ხილის ჯიშები = Промышленные сорта плодов Грузии = Varietes of commercial Georgian Fruits. - 1941. - 217, LIV გვ. : ილ., 71 ჩართ. ფურც. ფერ. ილ.. - დამატებითი თავფურცელი რუსულ, ინგლისურ ენებზე. - ტექსტი ქართულ, რუსულ, ინგლისურ ენებზე. - 73მ., ყდა 7მ., 2500ც.[MFN: 52879] UDC: 634.1/7:631.526.32 თემატიკა: - ხილის ჯიშები საქართველოში;
