მოხეტიალე დასები
მოხეტიალე დასები – სახალხო თეატრის ერთ-ერთი სახე ევროპისა და აღმოსავლეთის ქვეყნებში; მოხეტიალე კომედიანტები, რომლებიც დგამდნენ ცალკეულ სანახაობით ნომრებს, სახუმარო და სატირულ წარმოდგენებს, თოჯინურ სპექტაკლებს. სხვადასხვა ქვეყანაში მათ სხვადასხვა სახელწოდებები ჰქონდათ: საფრანგეთში – ჟონგლიორები, გერმანიაში – შპილმანები, ინგლისში – მენესტრელები, იტალიაში – მიმები, პოლონეთში – ფრანტები, რუსეთში – სკომოროხები, საქართველოში – მასხარა, უზბეკეთში – კიზიჩკი, ტაჯიკეთში – მასხარაბოზი.
XVI–XVII საუკუნეს წარმოიშვნენ მოძრავი პროფესიული კოლექტივები, რომლებიც ან კერძო ანტრეპრიზები იყვნენ, ანდა მსახიობთა ფსონიანი არტელები. ისინი წარმოდგენებს მართავდნენ ქალაქებსა და სოფლებში (ბაზრობებზე, ფუნდუკებში, აგრეთვე საგანგებო სათეატრო ნაგებობებში). მოხეტიალე დასებს მიეკუთვნებიან აგრეთვე „ინგლისელი კომედიანტები“, „ზემო გერმანელი კომედიანტები“ და ა. შ.
