ამაღლობელი რატი

რატი ამაღლობელი

ამაღლობელი რატი – (1977), ქართველი პოეტი, დაიბადა თბილისში. 1994 წელს დაამთავრა თბილისის მეექვსე გერმანული გიმნაზია, 2000 წელს კი – თსუ-ს ფილოსოფიის ფაკულტეტი. რატი ამაღლობელის ლექსები 1994 წლიდან პერიოდულად ქვეყნდება ქართულ და უცხოურ ლიტერატურულ გამოცემებში. იგი საქართველოს პენ-ცენტრის პრეზიდენტია 2011 წლიდან. 2010-2011 წლებში იყო ჟურნალ „ცხელი შოკოლადის” რედაქტორი. ატარებს ყოველკვირეულ ღია ლექციებს „წიგნის სახლში”. 2005-2010 წლებში იყო საზოგადოებრივი რადიოს ლიტერატურული გადაცემის, „ხმების ისტორია“, წამყვანი. გამოცემული აქვს კრებულები: „ზმნა” (2000)“, „თუ” (2003), „წრე” (2006), ლექსები (2011).

* * *

მივატოვე ბეთსაიდა

შენთან მოვხვდი ვერსაიდან.

გულო, ვიცი, სამსხვერპლოზე

ისააკის ბედს აიტან.

მივატოვე სამარია,

მზის შობა და ცა-მარიამ.

შუბლი ისევ გოლგოთაა,

გული ისევ სამარეა.

მივატოვე მეტანია,

ბეთბაგე და ბეთანია,

სამსხვერპლოზე ჩემი ბაღის

სევდა ამომიტანია.

მივატოვე ნაზარეთი

ვით სნეულმა ლაზარეთი

გზა გასამდა: მარიამით,

მართათი და ლაზარეთი.

მივატოვე, მომიტევე,

შენთან როგორ მოვიდე მე.

შენს მაცნეებს მაინც ვცნობდე,

ღამეს შუბლთან რომ მითევენ.

მივატოვე ბეთსაიდა,

შენთან მოვხვდი ვერსაიდან.

გულო, ვიცი გოლგოთაზე

უკვე ჯვარცმულ

ბედს აიტან.

წყარო

ქართველი პოეტები (ენციკლოპედია)