ბესიკური

ბესიკური — ლექსის ახალი, ორიგინალური, თოთხმეტმარცვლოვანი საზომი, შემოღებული ბესიკის მიერ. მისი ძირითადი სქემაა: ქორე (2) + დაქტილი (3) + მეორე პეონი (4) + ქორე (2) + დაქტილი (3). ამ მეტრითაა დაწერილი ბესიკის არაერთი ლექსი, მათ შორის ცნობილი „ტანო ტატანო, გულწამტანო, უცხოდ მარებო“. ამ ფორმისთვის დამახასიათებელია შინაგანი რითმები. ბესიკის მომდევნო ხანის ლირიკოსები ხშირად მიმართავდნენ ამ საზომს. ბესიკური საზომი XIX საუკუნეში დიდად გავრცელდა. (ა. ჭავჭავაძის „გოგჩის ტბა“, გ. ორბელიანის „ჩემს დას ეფემიას“, ნ. ბარათაშვილის არაერთი ლექსი), ოღონდ ამ დროიდან გაქრა შინაგანი რითმები. შექსპირის ივანე მაჩაბელისეული თარგმანებიც რომანტიკოსთაგან ინტონაციურად შეცვლილი ამ მეტრითაა შესრულებული.

ლიტერატურა

• ა. გაწერელია, ქართული ლექსი, თბ., 1955.

წყარო

ქართული მწერლობა: ლექსიკონი-ცნობარი